Уус Алдан улууһун Бороҕон сэлиэнньэтин Мүрү күөлүн Н.Н. Окоемов аатынан кытыла РФ Олох-дьаһах, хомунаалынай хаһаайыстыба уонна тутуу министиэристибэтин федеральнай эрэйиэстиригэр киирбит 48 тупсаҕайдык тутуу бастыҥ быраактыкатын кэккэтигэр киирдэ.
Бырайыагы дойду 88 субъегыттан киирбит 396 сайаапкаттан талан ылбыттара. Манна бырайыак олоххо киирбит таһымын, социальнай уонна экэнэмиичэскэй дьайыытын, инновационнай уратытын уонна олохтоох дьоҥҥо туһатын учуоттаабыттара. Ил Дархан Архитектура уонна куораты тутуу управлениетын салайааччыта Любовь Папок бу олохтоох салалта уонна архитектордар сыраларыгар үрдүк сыанабыл буоларын бэлиэтээтэ уонна дизайн-проегыы «Эйгэ» архитектура бюрота оҥорбутун санатта.
«Биһиги кытылбыт курдук эбийиэк Саха сиригэр өссө тутулла илик. Бороҕон олохтоохторо саҥа уопсастыбаннай уораҕайдарынан олус киэн тутталлар. Бу сылы Мүрү нэһилиэгэр Табыгастаах куорат эйгэтин тэрийии сылынан биллэрбиппит», — диэн Мүрү нэһилиэгин баһылыга Прокопий Румянцев кэпсээтэ.
Онон, быйыл GRD архитектура бюрота Бороҕон маастар-былаанын оҥорор, ону сэргэ сэлиэнньэ Киин болуоссатын бырайыага Бүтүн Арассыыйатааҕы ДФО-IV куонкуруска кыттар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
