Ил Түмэн судаарыстыбаннай мунньаҕын спикерэ Алексей Еремеев салайааччылаах норуот дьокутааттарын оробуочай бөлөҕө киин, илин эҥээр уонна Дьааҥы бөлөх улуустарын кэннилэриттэн салгыы Бүлүү бөлөххө олохтоох бэйэни салайыныыга саҥа сокуону уонна тыа хаһаайыстыбатыгар киирбит мэхэнньиисимнэри ырыта, дьүүллэһэ тиийдэ.
Ол курдук, спикер Алексей Еремеев, сис кэмитиэттэр бэрэссэдээтэллэрэ Александр Атласов, Владимир Прокопьев муус устар 9 күнүгэр Үөһээ Бүлүүгэ үлэтин саҕалаата. Кинилэр дьаһалтаҕа 10 чаастан саҕаламмыт нэһилиэнньэни кытта мунньахтарыгар, быйылгыттан аһы-үөлү оҥоруу сүрүн хайысхаларын улуустар бэйэлэрэ быһааралларыгар боломуочуйа бэриллибитинэн, киирбит мэхэнньиисимнэри, саҥа сокуон олоххо киириитин дьүүллэһиэхтэрэ.
Кэпсэтиигэ тыа хаһаайыстыбатын салаатын өйүүргэ ханнык хайысхалары сайыннарар тоҕоостооҕун, сайдыыны харгыстыыр кыһалҕалары, бородууксуйаны батарыы, миэстэтигэр оҥорон таһаарыы, сир боппуруостарын о.д.а. ырытыахтара, санаа атастаһыахтара. Нэһилиэк баһылыктара, тыа хаһаайыстыбатын кээпэрэтииптэрин уонна бааһынай хаһаайыстыбаларын салайааччылара, бу салаа исписэлиистэрэ атах тэпсэн олорон дьокутааттарга долгутар ыйытыыларын биэриэхтэрэ, хоруйдарын истиэхтэрэ.
Дьокутааттар күн устата улуус тутаах хаһаайыстыбаларын көрүөхтэрэ, оройуон устуоруйатын билсэр эбийиэктэргэ сылдьыахтара. Санатан эттэххэ, быйыл Үөһээ Бүлүү оройуона төрүттэммитэ 90 сыла.
Ил Түмэн пресс-сулууспата.
