Бу күннэргэ кыра куораттар уонна сэлиэнньэлэр почта үлэһиттэрин ортотугар ыытыллар Бүтүн Арассыыйатааҕы «Земский почтальон» куонкурус бастакы түһүмэҕэ түмүктэнэр.
Манна Арассыыйа почтальоннарыттан барыта 1000 тахса сайаапка киирбит. Ол иһигэр Элгээйи, Сардаҥа, Чинэкэ, Дьаархан, Харыйалаах, Чөркөөх, Нуораҕана, Петропавловскай, Ытык Күөл сэлиэнньэлэрин, Беркакит, Чульман, Аллараа Кураанах бөһүөлэктэр уонна Ньурба куорат почтальоннарыттан. Арассыыйа бастыҥ земскэй почтальонун дьүүл сүбэтэ, оттон Норуодунай почтальону уопсастыбаннай куоластааһын көмөтүнэн талыахтара. Биһиги кэрэспэдьиэммит Саха сириттэн кыттар икки почтальону кытта кэпсэттэ.
Нам улууһун почтальона Анастас Шестаков, интэриниэт төһө да сайдыбытын иһин, почта мэлдьи баар буолуо диэн санаалаах. «Төлөпүөнэ суох кырыы сирдэргэ кыһыннары-сайыннары ардахтан, бадараантан иҥнибэккэ дьоҥҥо тиийэбит», - диэн почтаҕа 40 сыл кэриҥэ үлэлиир, күн ахсын 150 дьиэни кэрийэр почтальон киэн тутта кэпсиир.
Оттон Сунтаар улууһун почтальона Наталия Николаева үлэлээбитэ 10 сыл буолбут. «Почта үлэтэ хаһан баҕарар элбэх. Үс нэһилиэги хааччыйар буоламмыт, ордук биэнсийэ түҥэтиитигэр илистэбит. Ол да буоллар, бириэмэни сөпкө аттаран, үлэни сөпкө үллэрэн барытын кыайабыт», - диэн кини сэһэргиир.
Куонкурус иккис түһүмэҕэ муус устар 11 күнүттэн ыам ыйын 1 күнүгэр ыытыллыаҕа. Манна Москубаҕа түмүктүүр тэрээһиҥҥэ барар 86 финалиһы талыахтара. Ону таһынан, ыам ыйын 12 күнүттэн бэс ыйын 5 күнүгэр диэри Арассыыйа почтатын «ВКонтакте» ситимигэр куоластааһын көмөтүнэн Норуодунай почтальону талыахтара.
Күндү ааҕааччыларбытыгар почта бары салааларыгар муус устар 12 күнүгэр диэри сыл икки аҥаарыгар хаһыаттарга уонна сурунаалларга чэпчэтиилээх сурутуу буоларын санатабыт. Ону сэргэ эрэдээксийэлэр тэйиччиттэн сурутууну эмиэ ыыталлар. Холобура, «Кыым» хаһыаты сурутуу 8 (968)150-67-15 нүөмэринэн барар.
Бэйэ кэр.
