Саха сиригэр өрүстэр сүнньүлэрин ыраастыыр үлэ бара турар. Сотору Абый улууһун Кэбэргэнэ сэлиэнньэтин аттыгар ыраастыахтара.
Экология министиэристибэтигэр бу халааны сэрэтиигэ туһалаах миэрэ буоларын бэлиэтээтилэр. «Халаан куттала үөскээтэҕинэ, өрүс сүнньүнэн ууну аһардар үлэни ыытыы туһунан быһаарыыны акт быһыытынан оҥоһуллар уонна муниципальнай тэриллии баһылыгынан илии баттанар», – диэн миниистир Евгений Перфильев чопчулаата.
Биэдэмистибэҕэ иһитиннэрбиттэринэн, ааспыт сылга федеральнай үбүнэн Горнай улууһун Өрт сэлиэнньэтин аттыгар Хаар Балаҕан үрэх сүнньүн уонна Орто Балаҕан сэлиэнньэтин аттыгар Индигиир өрүс сүнньүн ыраастыыр уонна дириҥэтэр үлэ ыытыллыбыт. Оттон өрөспүүбүлүкэ бүддьүөтүн суотугар Өймөкөөн сэлиэнньэтин кытылын бөҕөргөппүттэр. Федеральнай субсидия уонна өрөспүүбүлүкэ инбэстииссийэлиир кыттыгас үбүнэн Үөһээ Бүлүү сэлиэнньэтин аттыгар Бүлүү өрүс кытылын бөҕөргөппүттэр.
Билигин Горнай улууһун Бэс Күөлэ сэлиэнньэтин Дьүктүөнэ үрэҕин сүнньүн дириҥэтии бырайыагын-симиэтэтин оҥороллор уонна Алдан, Амма, Нүүйэ өрүстэргэ мууһу сымнатыы бырайыагын-симиэтэтин ситэрэллэр.
2025-2028 сылларга «Инженерная защита г. Верхоянска от паводковых вод» диэн эбийиэк хапытаалынай тутуута былааннанар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Галина Мозолевская хаартыската
