Саха сирин сорох олохтоохторо уот ситимин хааччыйар тэрилтэ уларыйбытын үчүгэйдик өйдөөбөккө олороллоро билиннэ. Дьиҥэр, уларыйыы туһунан иһитиннэриилэри элбэхтик таһаарбыттара, тарҕаппыттара.
Ол курдук, СӨ Сыана бэлиитикэтигэр судаарыстыбаннай кэмитиэтин 26.02.2025 с. 31 №-дээх Уурааҕынан 2025 сыл муус устар 1 күнүттэн «Якутскэнерго» ААУо оннугар өрөспүүбүлүкэни уотунан хааччыйыыны мэктиэлиир тэрилтэнэн Уһук Илиҥҥи энэргиэтикэ хампаанньата - «ДЭК» ААУо буолар. ДЭК хампаанньа, Якутскэнерго аатыттан Саха сирин уотунан хааччыйа турбут буолан, уларыйыы олохтоохторго туох да кыһалҕаны үөскэппэт.
Онон, Саха сирин олохтоохторо уоту туһаныы иһин муус устар 1 күнүттэн ааҕыллыбыт төлөбүрү ДЭК счетугар төлүөхтэрэ. Оттон ити күҥҥэ диэри мунньуллубут иэһи урукку курдук Якутскэнерго төлүөхтэрэ.
Онуоха, өҥө иһин төлөбүрү оҥоруу, көрдөрүүлэри тиэрдии ньымалара, килийиэн тус кэбиниэтэ уонна «ДЭК Якутскэнергосбыт» мобильнай сыһыарыы эмиэ уруккунан хаалаллар. Биирдиилээн дьон дуогабары саҥаттан түһэрсэллэрэ ирдэммэт.
«ДЭК» туһунан этэр буоллахха, тэрилтэни Уһук Илин эрэгийиэннэрин уотунан хааччыйар тиһиктэрин холбоон төрүттээбиттэрэ. Хампаанньа билигин сэттэ субъекка: Приморскай, Хабаровскай, Камчатскай кыраайдарга, Амур уобалаһыгар, ЕАО, Сахалин уобалаһыгар, Саха Өрөспүүбүлүкэтигэр үлэлиир.
«ДЭК» тэрилтэҕэ Саха сиригэр уотунан хааччыйыыны мэктиэлиир тэрилтэ статуһун Уһук Илиҥҥэ бигэ уонна бөҕө уот ситимин олохтуур, килийиэннэри кытта үлэни биир тиһиккэ киллэрэр уонна оросчуоту чэпчэтэр туһугар биэрдилэр.
Бэйэ кэр.
