СӨ ИДьМ пресс-сулууспата иһитиннэрбитинэн, Дьокуускай куоракка олорор икки дьахтар өр кэм устата сураҕа суох сүтэ сылдьыбыттар. Ийэлэрэ ыксаан ол туһунан полицияҕа биллэрбиттэр.
Ирдэһии түмүгэр, 36 саастаах дьахтары балыыһаттан булбуттар. Кини доҕотторун кытта хас да күн устата арыгылаан баран ыалдьан балыыһаҕа киирбит. Оттон кулун тутартан дьонугар биллибэккэ сылдьыбыт 32 саастаах дьахтары булан дьиэтигэр ыыттылар.
42 саастаах эр киһини ийэтэ көрдөөн сордоммут. Онтуката олох да кинини умнан баран арыгылыы сылдьыбыт. 45 саастаах эр киһи сүппүтүн туһунан полицияҕа уола биллэрбит. Булан дьиэтигэр илдьибиттэр.
Дьэ, ити курдук, өйдөрүн номнуо туппут буолуохтаах дьон, ийэлээхтэрин, оҕолоохторун умнан, арыгыны батыһан атах балай бараллар эбит. Биллэн турар, кинилэри манныкка куһаҕан дьаллык, эппиэтинэһэ суох, бэйэмсэх, атаах майгы тиэрдэр.
Сонун төрдө: СӨ ИДьМ пресс-сулууспата
