«Саха сирин тимир суоллара» аахсыйалаах хампаанньа дэлэгээссийэтэ муус устар 10 күнүгэр Минскэйгэ «2025. Тимир суол логистиката: сайдыы тыҥаан турар соруктара» III-c Норуоттар икки ардыларынааҕы Таһаҕас кэмпириэнсийэтигэр кытынна.
Толорооччу дириэктэр Дмитрий Кондратов хампаанньа үлэтин-хамнаһын, ситиһиитин уонна инники былаанын билиһиннэрэр дакылаатыгар Минскэй куоракка «Саха сирин тимир суоллара» АХ филиала аһылларын туһунан биллэрдэ. Кини Бэрэстэбиитэлистибэ үлэтэ Беларусь Өрөспүүбүлүкэтэ уонна Саха сирин икки ардыгар табаары тиэйиини быһа хааччыйыыга туһуланыаҕын бэлиэтээтэ.
Саҥа «Минскэй – Столбовая – Аллараа Бэстээх» маршрут логистиканы чэпчэтэрэ уонна тиэрдии кэмин 20 күҥҥэ диэри кылгатара сабаҕаланар. Маны сэргэ, табаары тиэрдии быстыбакка уонна бигэтик барара, тырааныспар ороскуота аччыыра мэктиэлиир. Бу барыта табаар сыанатыгар үчүгэй өттүнэн эрэ дьайыахтаах.
Филиалы арыйыы Саха сирин дэлэгээссийэтэ Беларусь Өрөспүүбүлүкэтин табаары оҥорон таһаарааччыларын, Экэниэмикэлэрин министиэристибэтин уонна Тимир суолларын салалталарын кытта көрсөн кэпсэтиилэрин түмүгэр ситиһилиннэ.
Сонун төрдө: "Саха сирин тимир суоллара" аахсыйалаах хампаанньа
