Үөһээ Дьааҥы улууһугар Патриотизм уонна гражданскай көҕүлээһин сылларын чэрчитинэн, муус устар 10-12 күннэригэр Саха АССР Төрүт Сокуонун уонна Декларациятын ааптардарыттан биирдэстэрэ, 1920-21 сс. Саха сирин автономиятын тэрийэр хамыыһыйа чилиэнэ Георгий Семенович Ефимов төрөөбүт күнүгэр анаммыт тэрээһиннэр аастылар. Кини Үөһээ Дьааҥы Дулҕалаах нэһилиэгэр 1892 с. муус устар 10 күнүгэр төрөөбүтэ.
Тэрээһиннэр Баатаҕай улууһун киин Верхоянскай куорат оскуолатын бибилэтиэкэлэригэр, В.З. Кириллина аатынан “Тымныы полюһа” кыраайы үөрэтэр түмэлгэ аастылар. Дулҕалаах нэһилиэгэр Г.С. Ефимов, саха норуодунай поэта М.Д. Ефимов тахсыбыт Ефимовтар аҕа уустарыгар анаан ыытылынна. Тэрээһиннэр бочуоттаах ыалдьыттарынан Моисей Ефимов сиэнэ, “Саха” НКИК гендириэктэрин 1-кы солбуйааччы Ирина Ефимова кэлэ сырытта.
Ирина Владиславовна Г.С. Ефимов аатын үйэтитиигэ үлэлиир бырабыыталыстыба хамыыһыйатын үлэтин билиһиннэрдэ. Көрсүһүүлэргэ тыл эппит дьон дойдуларын улахан патриоттара Ефимовтар ааттарын үйэтитиигэ этиилэрин киллэрдилэр, өйүүллэрин биллэрдилэр.
Сонун төрдө: “Үөһээ Дьааҥы МР” дьаһалтатын пресс-сулууспата
