Хаһыаттарга-сурунаалларга көмөлөһүөххэ наада

 

 

 

Бэчээт таһаарыыларын сүрүн эрэдээктэрдэрин түмэр Арассыыйа эрэгийиэннэрин СМИ-лэрин салайааччыларын альянса (АРС-ПРЕСС) олус уустук быһыы-майгы үөскээн, Эйиэхэ сурук суруйан эрэбит. Сүүһүнэн сыл устуоруйалаах хаһыаттар тахсан бүттүлэр, хаһыаттар уонна сурунааллар бэчээттээнэллэрэ аҕыйаата, күн аайы тахса турбут хаһыаттар нэдиэлэҕэ биирдэ бэчээттэнэр буоллулар, тиражтар түһэллэр. Нэһилиэнньэ электроннай уонна интэриниэт СМИ-лэртэн ааҕар информациятыттан быдан хаачыстыбалаах информацията аҕыйаата.

 

Бэчээт СМИ-тин эйгэтигэр үөскээбит уустук балаһыанньа объективнай төрүөттээх. Кэлиҥҥи үс сыл иһигэр кумааҕы уонна полиграфия оҥорон таһаарыытын сыаната 25-30 бырыһыанынан ыараата. Ону тэҥэ эмискэ тиэйии-таһыы ороскуота улаатан, сурутуу сыаната үрдээтэ. Оттон сурутуу сыаната хас да суолтан тутулуктаах. Киһи соһуйара, дьиктитэ диэн, сурутуу сыанатыттан 50-70 бырыһыана – Арассыыйа почтатын өҥөтүн сыаната. Ити сыыппара сыллата улаатан иһэр эрээри, почта өҥөтүн хаачыстыбата төттөрүтүн мөлтүүр эрэ. Почта биэдэмистибэтэ аахсыйалаах тэрилтэ буолуоҕуттан, уонунан сыллар усталарыгар олоҕурбут почтовиктар уонна суруналыыстар бииргэ үлэлиир тиһиктэрэ суох буолла. Түмүгэ: үгүс ааҕааччы сурутуу сыанатын кыайан уйуммат буолла.

 

2013 сыллаахха РФ Бэрэсидьиэнэ В.В. Путин Ыйааҕынан, Арассыыйа почтата социальнай суолталаах өҥөнү оҥорор уһулуччу суолталаах тэрилтэлэр кэккэлэригэр киирбитэ.

 

Арассыыйа почтата социальнай суолталаах өҥөнү оҥорууга сыһыана хайдах уларыйбытын мөккүһүллүбэт чахчылар туоһулууллар. Дойдуга үлэлиир почта салаалара үлэлиир бириэмэлэрэ кыччыыр эбэтэр букатын сабыллаллар. Почтальоннар аһара кыра хамнастаахтарыттан сылтаан, үлэлэриттэн уурайаллар. Хаһыаттар-сурунааллар ааҕааччыга икки нэдиэлэттэн саҕалаан балтараа ыйга тиийэ хойутаан тиэрдиллэллэр. АРС-ПРЕСС Арассыыйа почтатын салаалара бары кэриэтэ федеральнай уокуруктарга хайдах үлэлии-хамсыы олорорун бэркэ билэр. Балаһыанньа ханна даҕаны киһини үөрдүбэт.

 

Красноярскай кыраай: 797 почта отделениета баарыттан, 237-тэ үлэлиир.

 

Сахалин уобалаһа: бэчээт таһаарыылара хойутаан кэлэллэриттэн, дьон сурутартан батынар. Эрэгийиэн салалтата тыа сиригэр модульнай почталары тутан көмөлөһө сатыыр эрээри, хамнас кыратыттан ким да үлэлиэн баҕарбат.

 

“Урал” макро-эрэгийиэнэ: почтальон тиийбэт. Хаһыат хойутаан тиийэр эбэтэр тиэрдии өҥөтө букатын да суох. Макро-эрэгийиэн салалтата муниципальнай СМИ-лэр салайааччыларын кытта көрсүһүүтүгэр хаһыаты потча салааларыгар атыылыырга бэлэмин туһунан эппитэ эрээри, ол барыта тыл уонна этии таһымынан хаалбыта.

 

Самара уобалаһа: Арассыыйа почтатын салааларыгар гречканы уонна атын бородууктаны атыылыыллар, оттон хаһыат кэмигэр тиэрдиллибэт. Эрэгийиэн кэккэ нэһилиэнньэлээх пууннарыгар Интэриниэт уонна мобильнай сибээс суох, ол гынан баран, оннук түҥкэтэх сирдэргэ почта салаалара сабыллаллар – үлэлиир киһи суох. Дьон үҥсэр, бэчээт сурутуута түһэр. Самара почтамта, УФПС эмиэ бэйэтин курдук, дьэбин уоһан олорор, эрэдээксийэлэр төлөпүөннээтэхтэринэ да, суруйдахтарына да, хоруйдаабат.

 

Саха сирэ: былырыын 7 почта отделениета сабыллыбыта, быйыл даҕаны онтон уратыта суох буолара күүтүллэр. Периодика хаһыат аатыттан ааһан, макулатураҕа кубулуйан, ый-балтараа ый хойутаан тиэрдиллэр. Ол түмүгэр, биллэн турар, сурутуу түһэр.

 

Бу сүрүн төрүөтэ – приоритет уларыйыыта. Нэһилиэнньэ былааһы кытта ситимнэһэр тиһигин быһыытынан тэриллибит почта сибээһэ кэлиҥҥи уонунан сылларга Бэрэсидьиэн Ыйааҕынан быһаарыллыбыт сүрүн соругун халбарыччы анньан, иккис былааҥҥа көһөрдө. Бүгүн почтовиктар судаарыстыба интэриэһин умнан, ырыынак атыытын-тутуутун инники күөҥҥэ таһааран, бүтүн дойду таһымнаах супермаркеттыы атыыны тэрийэллэр.

 

Почта салааларын сабыллыытын иккис төрүөтэ – оптимизация сыыһа ыытыллыыта, ол түмүгэр, оройуон почталарын отделениелара холбостулар. Холобур, Ленинградскай уобаласка Всеволжскай уонна Приозерскай оройуоннааҕы отделениеларын холбообуттара, оттон олор икки ардылара 180 км. Всеволжскайтан Приозерскайга диэри күн аайы кэрэспэдьиэнсийэ таһыллыытын түмүгэр, почта тырааныспара туһаттан таҕыста, пресса хойутаан тиийэр буолла. Балаһыанньаны бэрээдэктээн диэн көрдөһүүгэ, почтовиктар оптуобус сырыыта куһаҕан, онон почтальоннар нэһилиэнньэлээх пууннарга сотору-сотору сылдьар кыахтара суох дииллэр.

 

Үбү-харчыны кэмчилиир туһугар оҥоһуллубут оптимизация дьыалатыгар кэлэн кыһалҕаны эрэ үөскэттэ: оройуон почталарын салааларын үлэтэ туран хаалла, коммуникация кэһилиннэ, оттон ол түмүгэр СМИ сурутуута түстэ, почта оҥорор өҥөтүн хаачыстыбата мөлтөөтө.

 

Ростовка “Наше время” хаһыат сурунаалыстара эспэримиэн оҥорон көрдүлэр – сурутааччы быһыытынан почта салааларыгар сылдьан, ханнык хаһыаты-сурунаалы сурутар ордугун сурастылар. Элбэх киһиэхэ: “Акаарынан дьарыктаныма, ханнык хаһыаты этэҕиҥ, син биир ким да аҕалбат”, – диэн хоруйдаабыттар. Маннык хартыынаны ханна баҕарар кэриэтэ көрүөххэ сөп.

 

Арассыыйа почтата сылга 10 ый сурутууну оҥорор. Үтүө кэмнэргэ ити кэм иһигэр кини уонча миллиард солкуобайы киллэрэрэ (аһаҕас источник дааннайдара). Ону нэһилиэнньэттэн уонна эрэдээксийэлэртэн киирэр уһун болдьохтоох, бырыһыана суох кирэдьиит быһыытынан сыаналыахха сөп этэ. Таһаарыылар харчыларын сурутуу түмтүктэммитин эрэ кэннэ ылаллара. Бу, бэл, Арассыыйа почтатын таһымыгар кырата суох харчы этэ.

 

Күн бүгүн биһиги почтаны кытта быһаччы быһаарса сатыырбыт туох даҕаны көдьүүһэ суох. АРС-ПРЕСС генеральнай дириэктэр М.Ю. Волковка аадырыстаммыт суруктарыгар, бэркэ буоллаҕына, туох даҕаны чахчыларынан бигэргэммэтэх көлбөрүтэр суруктары ыыталлар. Оттон биһиэхэ Арассыыйа почтатын туһугар эрэ оҥоһуллар сурутуу өйдөммөт тарыыбын, бэчээт таһаарыыларын тиэрдии өҥөтүн мөлтөх хаачыстыбатын, хаһыаттар-сурунааллар интэриэстэригэр кыһаллыбат буолуу туһунан ыйытыыларбытыгар хоруй наада.

 

Ытыктабыллаах Михаил Владимирович, Эйигиттэн бэчээт СМИ-тин эйгэтигэр үөскээбит кыһалҕаларга болҕомтоҕун хатыыргар уонна ол суоллары быһаараргар көрдөһөбүт.