СӨ Экология, айылҕаны туһаныы уонна ойуур хаһаайыстыбатын министиэристибэтэ ходуһаларга, саппаас оттуур уонна тыа хаһаайыстыбатыгар анаммыт сирдэргэ өртөөһүн бобуулааҕын РФ Бырабыыталыстыбатын 2020 сыл балаҕан ыйын 16 күнүнээҕи 1479 №-дээх Уурааҕынан бигэргэммит баһаары сэрэтэр эрэсиим ирдэбиллэрин 185-с пуунунан бобуулааҕын санатар.
Биэдэмистибэҕэ сэтиэнэҕи өртөөһүнү ойуур эрэ пуондатыгар баһаары сэрэтэр соруктаах ыытыахха сөптөөҕүн тоһоҕолууллар. Ону «Якутлесресурс» тэрилтэ исписэлиистэрэ, бары ирдэбили тутуһан саҕаланыаҕыттан бүтүөр диэри кэтээн-манаан туран, ыытыахтаахтар. Тыа хаһаайыстыбатын үлэһиттэрэ ойуур пуондатыгар киирэр маһа суох сирдэргэ өртөөһүнү ыытыы ирдэнэрин туһунан этиилэри «Якутлесресурс» тэрилтэҕэ ыытыахтарын сөп.
Сонун төрдө: СӨ Бырабыыталыстыбатын уонна Ил Дарханын пресс-сулууспата
