Жатайдааҕы суудуна тутар верфэ баржалары таһынан араас тимир конструкциялары тутар буолуоҕа. Ол курдук, эрэгийиэн аан бастакытын массыына сылдьарыгар аналлаах хомуллар муосталары тутан таһаарыаҕа. Ол туһунан Айсен Николаев муус устар 27 күнүгэр быһа эпииргэ иһитиннэрдэ.
Ил Дархан этиитинэн, бастакы хомуллар муостаны Чурапчы улууһугар, онтон салгыы атын улуустарга оҥорон ыытыахтара. Маны таһынан, верфэҕэ паромнары тутуохтара. Ол курдук, Сунтаар улууһун сайаапкатынан тыа хаһаайыстыбатын тиэхиньикэтин тиэйэргэ анаан аччыгый туонналаах паром тутулла турар. Быйыл бүтэриэхтээхтэр.
Өссө муус устар 25 күнүгэр Жатайдааҕы суудуна тутар верфэҕэ бастакы суудунаны тутан саҕалаатылар. Бу кутуллар таһаҕаҕы, селитрэни, чоҕу, контейнердары тиэйэргэ аналлаах «өрүс-байҕал» кылаастаах баржа буолуо. Устар аал 7 тыһ. туоннаҕа тиийэ таһаҕаһы тиэйэр кыахтаах. Ил Дархан этэринэн, собуот сылга 10 маннык суудунаны оҥорон таһаарыан сөп.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Алексей Рудых
