Киинэ пуондатын ЕАИС тиһигин көрдөрүүтүнэн, АБДь кыттыылаахтарын дьоруойдуу быһыыларын туһунан бастакы патриотическай «Алдан» дыраама ыам ыйын 1 күнүгэр саҥа саҕаланаат 1,42 мөл. солк. хомуйда. Онон, дойду үрдүнэн бастыҥ көрдөрүүлээх 10 киинэ ахсааныгар киирдэ. Уһун өрөбүллэргэ киинэ өссө элбэх үбү хомуйар чинчилээх. Көрдөрүүттэн киирбит харчы байыастары уонна маннык ис хоһоонноох киинэлэри өйүүргэ барыаҕа.
«Алдан» киинэ дойдутун иннигэр ытык иэһин толоро уонна байыастары быыһыы анал байыаннай дьайыыларга тус баҕатынан барбыт ИТ-урбаанньыт туһунан кэпсиир. Сүрүн персонаж прототибэ байыаннай быраас, Эр санаа уордьанын кавалера Николай Потапов буолар. Кини бааһыран дойдутугар эргиллэн ИТ эйгэтигэр үлэлии сылдьар.
Режиссер Дмитрий Кольцов инники Тимофей Сметанин сэһэнинэн «Рядовой Чээрин» киинэни уһулан таһаарбыта. Оруолларга Иван Охлобыстин, Дмитрий Дюжев, Илья Яковлев, Ольга Красько, Владимир Охлопков уонна да атыттар уһуллубуттар. Оттон «Шатун» полковнигы оонньообут РФ үтүөлээх артыыһа Дмитрий Дюжев Дьокуускайга киинэ премьератыгар көрөөччүлэри эҕэрдэлээн барда.
Сонун төрдө: CӨ Бырабыыталыстыбатын уонна Ил Дарханын пресс-сулууспата
