Ыам ыйын 4 күнүгэр Хаҥалас улууһун Булгунньахтаах сэлиэнньэтигэр 80 сыл анараа өттүгэр Сталинград аннынааҕы кырыктаах кыргыһыыларга дьоруойдуу охтубут саха саллаатын, кыһыл аармыйа байыаһын Илья Дмитриевич Алексеев кырамтатын ийэ буоругар харайыы сиэрэ-туома ыытылынна.
Илья Алексеев Аҕа дойду улуу сэриитигэр 1942 сыллаахха 2-с Дьөккөн нэһилиэгиттэн ыҥырыллыбыта уонна Сталинград аннынааҕы кыргыһыыларга сураҕа суох сүппүтэ. Кини кырамталарын Волгоград уобалаһын Городищенскай оройуонугар «Гвардеец» уонна «Феникс» көрдүүр этэрээттэр булбуттара. Ону кытта саллаат тус докумуоннара – кыһыл армеец киниискэтэ, Орджоникидзевскай оройуон дьокутаатын дастабырыанньата уонна тирии портмонеҕа аҕыйан манньыат – көстүбүттэрэ. Ити маллар баар буоланнар, кини кимэ-туга түргэнник биллибитэ.
Суолдьуттар эппиттэринэн, Илья Дмитриевич кырамтата атын байыас кырамтытатын аттыгар биир окуопаҕа сыппыт. Оттон бу күн кини уҥуоҕун Булгунньахтаахха Таҥара дьиэтин таһыгар православнай итэҕэл үгэһинэн харайдылар. Онон, дьоруой аатын төрөөбүт сиригэр-уотугар махтанан, сүгүрүйэн, кэриэстээн ааттаатылар.
Сонун төрдө: СӨ Үлэ уонна социальнай сайдыы министиэристибэтэ, "Хаҥалас" хаһыат
