Өрөспүүбүлүкэтээҕи катастрофа мэдиссиинэтин киинин (РЦМК) быраастара үһүс этээс түннүгүттэн аспаалга түспүт биир саастаах кыысчаан олоҕун быыһаатылар. Санатар буоллахха, иэдээннээх түбэлтэ Бүлүү куоракка ыам ыйын 4 күнүгэр буолбута. Ыарахан туруктаах оҕону улуус киин балыыһатын реанимациялыыр отделениетыгар укпуттара.
Олохтоох быраастар оҕо төбөтүн уҥуоҕа элбэх сиринэн тостуулааҕын, мэйии эчэйиитэ өссө дириҥиир кутталлааҕын быһаараннар, санитарнай авиацияны ыҥырбыттар. Онуоха, Эдьигээҥҥэ ыараханнык эчэйбит эр киһини эпэрээссийэлээн саҥа бүппүт биригээдэ суһаллык Бүлүүгэ барарга күһэллибит. Кыысчааны уопуттаах нейрохирург Семен Сивцев эпэрээссийэлээбит. Киниэхэ анестезиолог-реаниматолог Мордовской Д.М., фельдшер Николаев Б.В. көмөлөспүттэр. Эпэрээссийэ этэҥҥэ ааспытын, туруга бэттэх кэлбитин кэннэ оҕону Национальнай мэдиссиинэ киинин Педиатрическай салаатыгар анестезиолог-реаниматолог Заровняев В.А. уонна фельдшер Сивцев Г.Е. арыаллаан, көрөн-харайан аҕалбыттар.
Оттон эпэрээссийэни оҥорбут нейрохирург Семен Владимирович, Дьокуускайга массыынанан айаннаан кэлээт, Мэҥэ Хаҥаласка эмиэ уустук эпэрээссийэни оҥоро ыстаммыт. Ити курдук РЦМК быраастара олус ыксаллаах уонна ноҕоруускалаах үлэҕэ сылдьаллар эбит. Бу, биллэн турар, дириҥ билиини, улахан тулууру, үрдүк идэтийбит таһымы эрэйэр.
Сонун төрдө, хаартыска: СӨ Доруобуйа харыстабылын министиэристибэтэ
