Ыам ыйын 7 күнүгэр Саха сирин бары улуустарыгар «Свеча памяти» аахсыйа ыытылынна. Дьокуускай куорат Кыайыы болуоссатыгар бу аахсыйаҕа 15 тыһ. тахса киһи кыттыбыта. Кинилэр чүмэчилэри ууран «Победа 80» диэн суругу оҥорон таһаарбыттара.
Ыам ыйын 8 күнүгэр Дьокуускай куорат Ленин проспегар 5,5 тыһ. тахса паара, ол эбэтэр 11 000 тахса эдэр-эмэн дьон, «Кыайыы вальса» аахсыйаҕа сэрии саҕанааҕы таҥаһы таҥнан үҥкүүлээтилэр.
Ыам ыйын 9 күнүгэр Саха сирин «Өлбөт үйэлээх пуолкатын» хаамыытыгар 145 тыһ. кэриҥэ өрөспүүбүлүкэ олохтооҕо кытынна: улуустарга – быһа холуйан 95 тыһ., Дьокуускайга – 50 тыһ. кэриҥэ.
Дьокуускайга Кыайыы болуоссатыгар үгэс буолбут «Кыайыы оһуохайа» дуорайда. 10 тахса бастыҥ этээччи Аҕа дойду Улуу сэриитин кыттыылаахтарын, тыыл үлэһиттэрин дьоруойдуу быһыыларын хоһуйдулар. Кыайыы оһуохайа Саха сиригэр 1945 с. бэс ыйыттан бастакы Кыайыы ыһыаҕыттан ыла буолар.
Москуба к. Кыайыы Парадыгар биир дойдулаахпыт, Арассыыйа Дьоруойа Андрей Григорьев-Тута кыттыыны ылла. Кини парады Бэрэсидьиэн Владимир Путинтан чугас иккис эрээккэ туран көрдө. Бу Кыайыы 80 сылын устуоруйатын биир чаҕылхай түгэнэ буолла.
Бэйэ кэр.
