Кыайыы күнүгэр Орто Халыма куоракка өрүс кытылыгар тупсарыллан тутуллубут Кыайыы болуоссатын үөрүүлээхтик арыйдылар. Бырайыак Уһук Илин эрэгийиэннэрин ортотугар Бүтүн Арассыыйатааҕы күөн күрэскэ кыайан 100 мөл. солк. кээмэйдээх грант ылбыта.
Баһылык Ксенофонт Кривошапкин этэринэн, Халыма кытылыгар уруккуттан даҕаны элбэх дьон мустар. Онон, мантан антах саҥа болуоссакка Халыма өрүс күнүн, Муус устар күнүн уонна да атын тэрээһиннэри ыытыахтара. Тупсаран тутуу кэннэ 200 м² иэннээх болуоссат 2 000 м² тиийэ кэҥээтэ. Манна Т-34 тааҥка пааматынньык, сынньанар зоналар, оҕо оонньуур былаһааккалара, аныгылыы архитектура оҥоһуктара уонна мэҥэ уоту кэрэһэлиир «Всполохи» инсталляция баар буоллулар. Өссө үрдүк өйөнөрдөөх, тыал хайысхатын көрөн эргитэн биэрэр, кэннигэр олохтоохтор хоһоонноро кыһыллан суруллубут ыскамыайкалара турдулар. Оттон Набережнай уулуссаҕа түһүүгэ сытан сынньанар сирдээх амфитеатр тутулунна. Маны хараҥаҕа сырдаан көстөр «Орто Халыма» диэн сурук киэргэттэ.
Болуоссаты тупсаран тутуу сүрүн толкуйа Орто Халыма – араас омук өйдөһөн-өйөһөн олорор кыра хотугу куоратын – уратытын көрдөрүү буолар. Архитектурата уонна эбийиэктэри сырдатыыта дьүкээбили санатар, киэргэтиигэ фиолетовай уонна от күөҕэ өҥнөр дэгэттэрин, Чолбон оһуорун туһаммыттар.
Сонун төрдө: Территориялары сайыннарыыга сатабыл киинэ
