Саха сирин хонууларыгар буору сиигирдэр туһугар агротехническэй үлэ ыытыллар. Тыа хаһаайыстыбатын тэрилтэлэригэр ыһыы хампаанньатыгар бэлэмнэнэллэр. Быйыл Саха сиригэр тыа хаһаайыстыбатын култууратын 51 тыһ. гектардаах сиргэ ыһар сорук турар. Ол туһунан СӨ Тыа хаһаайыстыбатын уонна аска-үөлгэ бэлиитикэтин министиэристибэтигэр кэпсээтилэр.
«Билигин кытаатан куоттарбакка боромньулааһыны ыытыахтаахпыт. Хойутаатахха, сир сиигин түргэнник сүтэрэн, үүнүүгэ охсуон сөп», – Үүнээйини үүннэриини сайыннарыы, сири оҥоруу уонна нүөлсүтүү салааларын дэпэртээмэнин салайааччыта
Вячеслав Гаврильев быһаарда.
Амма улууһун тыа хаһаайыстыбатын управлениетын салайааччыта Ион Кононов иһитиннэрбитинэн, бастакы хаһаайыстыбалар бааһыналары бэлэмнээһини ыам ыйын 8 күнүгэр саҕалаабыттар. Ыһыы хампаанньатын саҕаланыытыгар «Амма», «Бөтүҥ» уонна «Абаҕа», «Сэргэ-Бэс» хаһаайыстыбалар кыттыспыттар. Ыам ыйын 12 күнүгэр «Болугур» хаһаайыстыба кыттыспыт.
Ити курдук нэдиэлэ устата тыа хаһаайыстыбатын тэрилтэлэрэ сииги тутууну түмүктээн ыһыыга киириэхтэрэ. Быйыл улууска былырыыҥҥытааҕар 170 гектарынан киэҥ сиргэ – 3 727 гектарга -- ыһыыны ыытар санаалаахтар. Хаар уута буору ситэри сиигирдибэтэҕин үрдүнэн, оҥорон таһаарааччылар ыам уонна бэс ыйынааҕы сөҥүүлэргэ эрэнэллэр. Маны таһынан сөҥүүнү зондировщик-сөмөлүөттэр түһэриэхтэрин сөп.
Сонун төрдө: СӨ Бырабыыталыстыбатын уонна Ил Дарханын пресс-сулууспата
