Ыам ыйын 15 күнүгэр «Якутяне в боях за освобождение земли Новгородской» диэн саҥа кинигэ онлайн-биһирэмэ буолла. Ааптар – өр сылларга сахалар Аҕа дойду сэриитигэр кыттыыларын чинчийбит Александр Калашников. Кини «Воины-якутяне» хас да сиэрийэлээх кинигэтэ устуоруйаны үйэтитиигэ сүҥкэн кылааты киллэрбитэ.
Тэрээһини Новгород уобалаһын Судаарыстыбаннай уонна Саҥардыллыбыт устуоруйа судаарыстыбаннай архыыптара көҕүлээн СӨ Национальнай архыыбыгар этии киллэрэн ыыттылар. Биһирэм иитинэн Новгород сирин ньиэмэс-фашист халабырдьыттарыттан босхолооһуҥҥа аналлаах төгүрүк остуол буолан ааста. Манна ураты болҕомто Саха сирин буойуннарыгар уурулунна.
Төгүрүк остуолга Новгородтааҕы архыып кэмитиэтин бэрэссэдээтэлэ Мария Пантелейчук, СӨ култуураҕа уонна духуобунай сайдыыга миниистирэ Афанасий Ноев, СӨ Бастайааннай бэрэстэбиитэлистибэтин Санкт-Петербурдааҕы салаатын сүрүн сүбэһитэ Альберт Рожин, СӨ Национальнай архыыбын дириэктэрэ Петр Румянцев, устуоруктар, кыраайы үөрэтээччилэр уонна да атыттар кытыннылар.
«Новгород олохтоохторо дойдуну нацистартан босхолообут Саха сирин буойуннарын хорсун быһыыларын умнубаттар. Ааптарга, сүрүн археограф Александр Калашниковка дириҥ махталбын биллэрэбин. Кини оҥорбут уустук үлэтэ Саха сиригэр эрэ буолбакка, Новгород уобалаһыгар сүдү суолталаах», – диэн Мария Пантелейчук тыл эттэ.
Альберт Рожин көрдүүр этэрээттэр үлэлэрин билиһиннэрдэ: «Кэнники сылларга тыһыынчанан Саха сирин олохтооҕун аатын сөргүппүттэр. Ол курдук, ыам ыйын 7 күнүгэр Старай Руссаҕа кимэ биллибит буойуннар ортолоругар Өлүөхүмэ олохтооҕо Илья Емельянович Борисов көстүбүт. Кини аата суруллубут ньуоскатын аймахтарыгар тиэрдибиттэр. Биир сүрүн арыйыынан Ильмень күөл кытылыгар 37 кыһыл армеец кырамтатын булуу буолар. Былырыын балаҕан ыйыгар биир дойдулаахтарбытын чиэстээн-бочуоттаан ийэ буорга кистээбиттэр.
Ааптар Александр Калашников кинигэни хайдах бэлэмнээбитин сиһилии кэпсээтэ уонна биир дойдулалаахтарбыт ааттарын үйэтитии туох суолталааҕын быһаарда.
«Новгород биһиги буойуннарбытын умнубакка өйдүү сылдьара миэхэ улахан чиэс. Ильмень кытылыгар турбут пааматынньыктар кэриэстэбил эрэ буолбатахтар, норуоттарбыт икки ардыларыгар быстыбат ситим туоһутунан буолаллар. Новгородтааҕы кэллиэгэлэрбэр устуоруйаҕа харыстабыллаах сыһыаҥҥыт иһин махтанабын», – диэн Александр Александрович тыл эттэ.
Сонун төрдө: СӨ Национальнай архыыба
