Мэҥэ Хаҥалас улууһун Тараҕай нэһилиэгин «Араҥас» дьиэ кыылын иитэр кээпэрэтиибин саҥа «Лампа» сайылыгар Сайылык күнэ буолла. Манна түөрт кыбартыыралаах дьиэлээх, 150 сүөһүнү батарар сайылык 6 мөл. солкуобайдаах баһылык граныгар тутуллан үлэлээн эрэр. Тэрээһиҥҥэ улуус ынах сүөһүнү иитэр бааһынай хаһаайыстыбалара муһуннулар, бастыҥ үлэһиттэри чиэстээтилэр.
Тыа хаһаайыстыбатын оҥорон таһаарааччыларын бырабыыталыстыба бэрэссэдээтэлин солбуйааччы Сергей Местников эҕэрдэлээтэ уонна үрдүк ыамнаах сайыны баҕарда. Кини сэбиэскэй кэмҥэ таһаарыылаахтык үлэлээбит сопхуос сайылыга сөргүтүллэн, улуус өйөбүлүнэн ыыр аппарааттаах пиэрмэ баар буолбутун, улуустарга бэриллибит боломуочуйаны Мэҥэ Хаҥалас улууһа сөпкө туһаммытын бэлиэтээтэ. Ол курдук, быйыл Мэҥэ Хаҥалас улууһун 17 нэһилиэгэр 43 сайылык үлэлиир. Манна 3 тыһыынчаттан тахса хороҕор муостааҕы туталлар.
«Араҥас» кээпэрэтиип салайааччыта Роман Герасимов хаһаайыстыбатын көрдөрдө. Манна барыта 215 хороҕор муостаах, ол иһигэр 135 ынах баар. Хаһаайыстыба улууска үүт аһы оҥорор үс тэрилтэттэн биирдэстэрэ, «Якутнацпродукт» СХПК сүрүн хааччыйааччыта буолар. Быйыл үүтү таһынан, эти астыыр сыах үлэҕэ киирдэ. Ону сэргэ сир аһынан сүмэһин, барыанньа оҥорон таһаараллар.
Сонун төрдө: CӨ Бырабыыталыстыбатын уонна Ил Дарханын пресс-сулууспата
