Госдума дьокутаттара дьиэ хаһаайыстыбатынан дьарыктанар, оҕолордоох, кырдьаҕас төрөппүттэрдээх дьахталларга ыйдааҕы төлөбүр аныыр туһунан сокуон бырайыагын бэлэмнээн киллэрдилэр. Төлөбүр кээмэйэ үлэлиир киһиэхэ олохтоммут минимум саҕа буолуоҕа уонна алта ый устата төлөнүөҕэ, онтон салгыы уһатыллар кыахтаныаҕа.
Ааптардар оҕолордоох уонна кырдьаҕас төрөппүттэрдээх дьахталлар дьиэ иһинээҕи үлэни кытта хамнастаах үлэни аттараллара элбэх уустуктары үөскэтэрин бэлиэтииллэр. Ыал аҕата аҕыйах харчыны өлөрөр буоллаҕына, ыал ийэтэ үксүгэр үлэҕэ-хамнаска охтор. Онон, кинилэр дьиэ хаһаайыстыбатынан, оҕо иитиитинэн, кырдьаҕас төрөппүттэри көрүүнэн-харайыынан дьарыктанарга усулуобуйа үөскэтэр соруктаахтар.
Онуоха, ыйдааҕы төлөбүрү ылар баҕалаах дьахтар дьиэ кэргэнин орто кээмэйдээх дохуота үлэлиир киһиэхэ олохтоммут минимум икки төгүллээх кээмэйин аһарыа суохтаах. Оттон миграннар Арассыыйа гражданствотын ылбыт кэннэ биэс сыл олорбут буоллахтарына биирдэ дьиэ хаһаайкатын ыйдааҕы төлөбүрүн ылар бырааптаналлар.
Сонун төрдө: РФ Госдумата
