Биһиги үлэһиппит өрүһү паромунан туораан иһэн икки кыыһы көрсүбүт. Кинилэр ханна эрэ айаннаан иһэллэрэ тута биллэр эбит. Ыйыталаһан баран сүрдээҕин соһуйбут. Кыргыттар уһун уонна уустук суоллаах-иистээх Магадан куоракка «автостоп» ньыматынан айаннаан иһэллэриттэн. Онон, кинилэри кытта сиһилии кэпсэппит. Дьааҥыттан төрүттээх Дайаана уонна Намтан төрүттээх Алина бу айанынан дьоҥҥо холобур буолуохтарын баҕараллар.
“Маҥнай Өймөкөөн улууһугар тиийиэхпитин баҕарбыппыт. Онтон судургута бэрт диэммит, аҕыйах күн хаалбытын кэннэ төһө эмэ уустук, ол эрээри быдан сонун сиргэ – Магадаҥҥа уонна Охотскай байҕалга тиийэргэ быһаарынныбыт. Автостоп ньыматын тоҕо таллыгыт диэтэххэ, уруккуттан баар айан көрүҥүн боруобалаары, дьиҥ көҥүлү билээри, араас дьону көрсөн кэпсэтээри. Самолекка олорон аҕыйах чааһынан көтөн тиийии сонун буолбатах, ким баҕарар оннук айанныыр кыахтаах. Оттон биһиги ураты айаны баҕарабыт”, - диэн Дайаана сэһэргээбит.
Итинник санаанан салайтаран, кыргыттар Халыма трассатынан: Дьокуускай – Мэҥэ Хаҥалас – Чурапчы – Таатта – Томпо (Хаандыга) – Уус-Ньара – Магадан маршрутунан айанныыр санаалаахтар. Баран иһэн кэрэхсэнэр сирдэргэ, аартыктарга, хайаларга, дэриэбинэлэргэ тохтоон айылҕаны көрөн, олохтоох дьону кытта алтыһан ааһыахтара, онтон кэлэн иһэн тохтобула суох айанныахтара.
«Санаабыт хоту буоллаҕына, икки нэдиэлэнэн эргиллэн кэлиэхпит. Биллэн турар, долгуйабыт уонна куттанабыт, ол эрээри сири-дойдуну көрөр баҕа өссө улахан», - дэһэллэр айанньыттар. Онон, хорсун кыргыттарга көнө суолу, ыраас халлааны, үтүө санаалаах аргыстары баҕарыаҕыҥ. Биһиги кинилэр айаннарын кэтээн көрүөхпүт уонна сырдатан иһиэхпит.
Андрей Шилов иһитиннэриитинэн.
