Мэҥэ Хаҥалас улууһун киинэ буолбут Аллараа Бэстээх бөһүөлэгэр В.В. Местников аатынан Култуурунай сайдыы киинэ тутуллан аһыллаары турар. Бу – Саха сиригэр «Култуура» национальнай бырайыак иитинэн тутуллубут саамай бөдөҥ эбийиэк. Киини тутуу 2022 сыллаахха саҕаламмыта. Маннык култуурунай кииннэр элбэх соругу толороллор уонна аныгылыы тэриллибит ис барааннаахтар.
Икки этээстээх уораҕай 3,2 тыһ. кв.м. тахса иэннээх. Манна 300 миэстэлээх көрөөччү саалата, 50 миэстэлээх киинэ саалата, ааҕар саалалаах бибилэтиэкэ, эрэстэрээн үлэлиэхтэрэ. Аныгы тэрилинэн хааччыллыбыт киинэ тыйаатырыгар премьералар көстүөхтэрэ, оттон LED-экраннаах кэнсиэртиир саалаҕа хайа баҕарар көрүҥнээх тэрээһиннэр ыытыллыахтара. Онон, олохтоохтор култуура өттүнэн сайдалларыгар бэртээхэй усулуобуйа тэрилиннэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
