2024 сыл ахсынньы 6 күнүгэр 60,36 карат ыйааһыннаах алмааһы ырааһынан уонна бөдөҥ алмаастааҕынан аатырар “Юбилейная” трубкаттан булбуттара. Алмааска норуодунай суруйааччы, геолог Василий Егоров-Тумарча аатын иҥэрдилэр. Бу туһунан Саха сирин суруйааччыларын бырабылыанньата иһитиннэрэр.
Ыам ыйын 27 күнүгэр Саха сирин суруйааччыларын бырабылыанньатыгар норуодунай суруйааччы Василий Егоров-Тумарчаҕа сэртипикээти уонна алмаас куоппуйатын тиксэрдилэр. АЛРОСА хампаанньа генеральнай дириэктэрэ Павел Маринычев аатыттан сэртипикээти Саха сирин суруйааччыларын сойууһуни бэрэссэдээтэлэ Гаврил Андросов үөрүүлээх быһыыга-майгыга туттарда. Кини аҕа саастаах кэллиэгэтигэр саҥа сүрэхтэммит алмаас курдук кытаанах доруобуйаны, өр сылларга айымньылаах үлэ үөһүгэр сылдьарыгар баҕарда. Василий Егоров-Тумарча бу күннэргэ саҥа арамаанын рукопиһын түмүктүөхтээх.
Үөрүүлээх тэрээһиҥҥэ кэллиэгэлэрэ уонна бэтэрээн геологтар ыалдьыттаатылар.
Саха сирин үтүөлээх геолога, геология-минералогия билимин кандидата Николай Кириллин Василий Егоров үлэтин ахтан-санаан ааста. Кини өйдөммөтөх түгэннэри таарыйда. Чуолаан, “Сарыылаах” кыһыл көмүс, сурьма баайдаах саҥа сири Василий Тумарча арыйбытын үрдүнэн атын дьон аатынан ыытан балыйбыттара. Ол эрээри, кырдьык хаһан баҕарар өрөгөйдүүр үгэстээх: 60 сыл ааспытын кэннэ кини аата төнүннэ. Василий Егоров бу сыллар тухары санаа баттыгастаах сылдьыбытын иһин киниэхэ сыл аайы сэдэх алмаас 1 каратын анаабыттара.
Бэтэрээн геологтар ааттарыттан норуодунай суруйааччыны “Арассыыйа геологическай разведкатын бэтэрээннэрэ” уопсастыбаннай түмсүү Саха сиринээҕи салаатын бэрэссэдээтэлэ Александр Петров истиҥник эҕэрдэлээтэ. Василий Егоров уопсастыбаннай түмсүүгэ күн бүгүнүгэр диэри идиэйэ, былаан генератора буоларын, геологтар хорсун быһыыларын, сыралаах үлэлэрин үйэтитэргэ ахсаабат кылаатын киллэрэрин бэлиэтээтэ. Холобур, Халымаҕа кыһыл көмүһү хостооһун бырамыысаланнаһа 2028 сылга 100 сыла бэлиэтэниэхтээх. Кини манна киэҥ-куоҥ былааннаах сылдьар эбит.
Саха сирин суруйааччыларын бырабылыанньата АЛРОСА хампаанньа салалтатыгар уонна СӨ бырамыысаланнаһын, геологиятын министиэристибэтигэр норуодунай суруйааччы 90 сааһынан сыаналаах дьоһун бэлэҕи оҥорбуттарыгар махтанна, кэнэҕэс хардарыта үлэлэһэр баҕалаахтарын иһитиннэрдэ.
Хаартыска: Саха сирин суруйааччыларын сойууһун пресс-киинэ.
