Дьокуускай куорат олохтоохторо уонна ыалдьыттара Өрөспүүбүлүкэ болуоссатыгар саһарбыт газону сонньуйа көрөллөр. Урут баччаларга күөх отунан-маһынан, сибэккинэн симэнэр болуоссаппыт быйыл сут дьыл кэлбитигэр дылы тымныы тааһынан, хаппыт отунан көрөн турар. Муҥ саатар, Ленин болуоссатыгар сибэкки олордуута хойутаата.
СӨ Архитектура уонна куораты тутуу управлениетын салайааччыта Любовь Папок саҥа болуоссат газона тоҕо көҕөрбөтөҕүн быһаарда. Кини этэринэн, газон кыайан силис тардыбатах. Онон, бэдирээттээх СЭТТЭ ХЭТ бу ыйга хаппыт газону түөрэн саҥаны ыһыаҕа. Ол кэмҥэ газоннаах сирдэри сабыахтара.
Ону таһынан, Любовь Папок бэҕэһээ холбоммут фонтан тэстэрин туһунан иһитиннэрии олоҕо суоҕун эттэ. Фонтаны оҕоҕо куттала суох буоллун диэн кыратык холбообуттар. Фонтан кыаҕын толору туһааннаах тэрээһиннэргэ туһаныахтара.
P.s.: Кырдьыга да, бэҕэһээ эбиэт кэннэ фонтан уута адьас намыһах уонна убаҕас этэ. Хата, көрдөөх ырыалары холбоон, болуоссакка бырааһынньык тыына баара. 
Хаартыска: Мария Васильева, СИА
Бэйэ кэр.
