Бэҕэһээ Жатайга олохтоохтор 2022 сыллаахха куоластаан туттарбыт бульвардара аһылынна. Бульвар Саха сирин уонна Жатай устуоруйатыгар суолталаах, бөһүөлэк суудуна өрөмүөннүүр собуотун салайааччыта, дьокутаата уонна бочуоттаах гражданина Владислав Шамшин аатын сүгэр.
Бульвар дизайн-бырайыагын «Живые пространства» күөн күрэс иитинэн 2020 сыллаахха Айталина Брызгалова оҥорбута. 2023 сыллаахха бырайыак Уһук Илиҥҥэ I Бүтүн Арассыыйатааҕы күөн күрэскэ кыайан федеральнай граны ылбыта. Сайаапкалары бэлэмнээһини LETO Куорат эйгэтин тэрийиигэ сатабыл киинэ уонна Архитектура уонна куораты тутуу управлениета сүрүннээбиттэрэ.
Бульвар уунан сырыы истиилинэн тутуллубут. Онон, манна долгуннар, хараабыл, порт тиэхиньикэтэ көстөллөр. Киириигэ «Долгун» арт-эбийиэк, дьаарбайар аллеялар, оҕо былаһаакката, бэлэсипиэттиир суол уонна скейтыыр былаһаакка бааллар. Сүрүн болҕомтону тымныы паарынан үрэр ураты фонтан тарта.
Сонун төрдө: LETO Куорат эйгэтин тэрийиигэ сатабыл киинэ
