АЛРОСА тэрилтэлэригэр барыта 35 тыһыынчаттан тахса киһи үлэлиир. Олор 80 бырыһыаннара – Саха сиригэр. Хампаанньа үгүс үлэһитэ – идэтин толору баһылаабыт, бэйэтэ алмааска тэҥнээх исписэлиис. АЛРОСА үлэһиттэрин өйүүргэ, көмөлөһөргө, кинилэр исписэлиис быһыытынан үүнэн-сайдан тахсалларыгар кырата суох болҕомтону уурар.
Биир оннук үтүө холобурунан быйыл хампаанньаҕа 16-с сылын үлэлиир Евгений Гаманов буолар. Кини 2009 сыллаахха “Мир” рудникка оборудованиены өрөмүөннүүр уонна көрөр-истэр силиэсэринэн үлэҕэ киирбитэ. Биир сыл үлэлээбитин кэннэ, сүрүн инженери үлэ харыстабылыгар уонна бырамыысыланнай куттал суох буолуутугар солбуйааччынан ананарга этии киллэрбиттэрэ.
“Ханнык хайысхаҕа үлэлиирбин бэрт судургутук талбытым. Үлэ харыстабылын уонна бырамыысыланнай куттал суох буолууларын эйгэлэрэ олус интэриэһинэй, кырата суох суолталаах буоланнар, тута сөбүлээбитим. Элбэх араас суолу быһаараҕын, элбэх киһини кытта алтыһаҕын, дьон-сэргэ үлэҕэ-хамнаска, оҥорон таһаарыыга сэрэхтээх буолуутун, кинилэргэ куттал суоһаабатын көрөҕүн. Хас биирдии үлэһит үлэ кэмигэр дэҥтэн-оһолтон, саахалтан куттаммакка, эрэллээхтик сылдьыахтаах уонна саамай сүрүнэ дьиэтигэр, кэтэһэр-ахтар дьонугар, туох да буолбакка, чөл-чэгиэн тиийиэхтээх”, – диэн кини кэпсиир.
Дьоҥҥо көмөлөр үтүө баҕа санаа, эппиэтинэстээх, бэрээдэктээх уонна ирдэбиллээх буолуу – Евгений Александрович куттал суох буолуутун харыстабылыгар тутуһар бириинсиптэрэ, кинини хамсатар сүрүн күүс. Билигин кини АЛРОСА Мииринэйдээҕи-Ньурбатааҕы байытар кэмбинээтин үлэ харыстабылыгар, бырамыысыланнай куттал суох буолуутугар уонна суолга сэрэхтээх буолууга отделын салайааччытын солбуйааччытынан үлэлиир.
Элбэх сыллаах уопуттаах, идэтин дэгиттэр баһылаабыт киһи буолан, кини өрөспүүбүлүкэҕэ үлэ харыстабылыгар бастыҥ үлэлээх исписэлиис буолла. Ол курдук, Евгений Гаманов оҥорон таһаарар эйгэ үлэһиттэрин ортолоругар ыытыллыбыт “Саха Өрөспүүбүлүкэтин үлэ харыстабылыгар бастыҥ исписэлииһэ” өрөспүүбүлүкэтээҕи куонкурус бастакы түһүмэҕэр кыайда.
Евгений Гаманов, АЛРОСА-ҕа үлэлиэҕиттэн, идэтин таһымын мэлдьи үрдэтэр, билиитин хаҥатар. Кини “Технологическай процесстарга уонна оҥорон таһаарыыга куттала суох буолуута” бырагырааманан үөрэнэн, “Техносфернай куттал суох буолуута” уонна “Сир аннынааҕы уонна шахта тутуулара” диэн дьупулуомнары көмүскээтэ.
Хампаанньа үлэһиттэринэн уонна кинилэр кыайыыларынан киэн туттар. Каадыр ис кыаҕын сайыннарар үлэ-хамнас, онно анаан үбү-харчыны тыырыы – АЛРОСА үлэтин биир тутаах суола. Хампаанньа үлэһиттэрин хамнаһын мэлдьи улаатыннарар, социальнай мэктиэ тиһигэ тупсарыллар. Алмааһы хостооччулар үлэлиир усулуобуйалара өрөспүүбүлүкэҕэ, арааһа, саамай үчүгэй буолуохтаах. Хампаанньа үлэһиттэр айар саҕалааһыннарын, идэни баһылыылларын, идэлэрин таһымын үрдэтэллэрин, сонотуоруйдарга сынньаналларын, доруобуйаларын көрдөрүнэллэрин, успуорт уонна эрчиллэр саалаларга дьарыктаналларын толору эбэтэр өлүүлээн төлүүр.
Сонун төрдө: АЛРОСА пресс-сулууспата
