Саха биир бастыҥ асчыта Николай Атласов ТНТ ханаал «Битва пикников» шоутугар бастаата. Кини кыттыбыт биэриитин бэс ыйын 1 күнүгэр көрдөрбүттэрэ.
Күрэс ирдэбилинэн кыттааччылар түргэн сокуусканы уонна сүрүн бүлүүдэни астаабыттара. Николай сокуускаҕа 15 мүнүүтэ иһигэр индейкалаах уонна мяталаах булочкалары бэлэмнээбитэ, оттон сүрүн бүлүүдэҕэ сыыр соустаах, кыһыл уонна сордоҥ искэхтээх, баклажаннаах семганы астаабыта.
Дьүүл сүбэтигэр оҕолор, ыытааччылар Роман Юнусов уонна Дмитрий Левицкий киирбиттэрэ. Кинилэр биир дойдулаахпыт астаабытын үрдүктүк сыаналаабыттара. Онон Николайга, бастыҥ барбекю-шеф буолбутунан, 50 тыһ. солкуобайы туттарбыттара.
Николай Атласов билигин «Тыгын Дархан» бренд-шебэ буолар. Кини, Иннокентий Тарбаахап үөрэнээччитин быһыытынан, саха куукунатын уонна саха асчыттарын аан дойдуга тарҕатыыны бэйэтин ытык иэһинэн ааҕар.
