Дьокуускайга бэс ыйын 11-14 күннэригэр үбүлүөйдээх XXV Бүтүн Арассыыйатааҕы Федеральнай Сабантуй ыытыллыаҕа. Бэлэмнэнии тэтимнээхтик барар, «Татаар тусаһатын» тутуу түмүктэнэр.
Сааскы ыһыыны уруйдуур Татаар национальнай бырааһынньыгар дойду 50 эрэгийиэниттэн 600 кэриҥэ киһи, Татарстан Өрөспүүбүлүкэтин Раиһа Рустам Минниханов салайааччылаах дэлэгээссийэ ыалдьыттыаҕа. Тэрийии ороскуотун Аан дойдутааҕы Татаар кэнгириэһэ уйунар. Сабантуй сүрүн тэрээһиннэрин бэлиэтиибит.
Бэс ыйын 13 күнүгэр Саха уонна Татарстан тусаһаларын 10.00 ч. арыйыахтара, оттон 12:00 ч. үөрүүлээх тэрээһин саҕаланыа. Сарсыарда 9:00 ч. «Туймаада» стадиоҥҥа успуорт төрүт көрүҥнэригэр «Корэш» күрэхтэһии уонна мас-рестлинг ыытыллыаҕа. Манна сүрүн бирииһи - «Лада Гранта» массыынаны Татарстан Раиһа Рустам Минниханов туруорар.
Татарстан уонна Саха сирин ускуустубатын маастардарын уонна айар кэлэктииптэрин «Созвездие талантов на земле Олонхо» кэнсиэртиир бырагыраамалара Хомсомуол болуоссатыгар уонна Сынньалаҥ пааркатыгар 13.00 чаастан буолуохтара.
Эмиэ ити күн Бэчээт дьиэтигэр «Развитие национальных средств массовой информации. Обмен опытом татарских и якутских медиакомпаний» диэн төгүрүк остуол, Национальнай бибилэтиэкэҕэ «Казань» сурунал ана нүөмэрин биһирэмэ ыытыллыахтара. Оттон киэһэ 19:00 ч. Опера уонна балет тыйаатырыгар Татарстан ускуустубатын маастардарын гала-кэнсиэрэ буолуоҕа.
Маны таһынан, бэс ыйын 11-12 күннэригэр Татарстан Буинскай судаарыстыбаннай драматическай тыйаатыра «Небесный тихоход», «Шобага» испэктээктэри көрдөрүөҕэ. Татаар киинэтин күннэрин бэс ыйын 12 күнүгэр 17.00 ч «Лена» киинэ тыйаатырыгар арыйыахтара.
