Быйыл сайын Саха сирин устудьуон этэрээттэригэр 3,5 тыһыынча кэриҥэ устудьуону уонна оскуола оҕотун үлэлэтэр санаалаахтар. Үгэс курдук, сайыҥҥы үлэ сезонун Арассыыйа күнүгэр Өрөспүүбүлүкэ болуоссатыгар арыйыахтара. Ол туһунан «Арассыыйа устудьуон этэрээттэрэ» уопсастыбаннай тэрилтэ эрэгийиэннээҕи салаатын салайааччыта Олег Сергучев кэпсээтэ.
«Сүрүннээн аҕыс бигэргэммит хайысханан үлэлиибит. Тутуу этэрээттэрэ Саха сиригэр уонна тас өттүгэр эбийиэктэри тутууга көмөлөһөллөр. Оҕо сынньанар лааҕырдарын баһаатайдара бааллар. Сиэрбис байыастара Крым Өрөспүүбүлүкэтин уонна Краснодар кыраайын куруортаах пууннарыгар үлэлиэхтэрэ. Сыллата буоларын курдук, сорохтор Камчатка, Сахалин, Приморье уонна Хабаровскай кыраай балык астыыр собуоттарыгар барыахтара. Мэдиссиинэ байыастара балыыһаларга уоппускаҕа барбыт персоналы солбуйуохтара. Уһук Илиҥҥи уокурук тимир суолларыгар пассажир вагонугар үлэлиир проводниктар этэрээттэрэ баар буолуохтара. Производство этэрээттэрэ араас оҥорон таһаарар тэрилтэлэргэ үлэлиэхтэрэ, холобура, КАМАЗ оҥорор собуокка», – диэтэ кини.
Сонун түгэнинэн оскуола оҕолорун кытта үлэ күүһүрбүтэ буолар. Ол курдук, оскуолалары кытта быһа сөбүлэһии түһэрсэн үлэлиэхтэрэ. Обургу оҕолор этэрээттэрэ Дьокуускайга археологическай хаһыыларга сылдьыахтара, тиэргэн баһаатайынан, түөлбэлэри тупсарыыга, көҕөрдүүгэ үлэлиэхтэрэ. Оҕолор бары хамнас ылыахтара. Сергучев этэринэн, былырыын муҥутуур үрдүк хамнаһы – ортотунан 200 тыһ. солк. тимир суол проводниктара ылбыттар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
