2024 сылтан АЛРОСА Корпоративнай университета саҥа үөрэх бырагырааматын үлэлэтэр. Официальнай үлэтэ суох дьону Саха сирин алмааһы хостуур бөдөҥ хампаанньатыгар үлэҕэ ылар сыаллаах үөрэх тэриллэр. Үлэҕэ киириэхтэрин иннинэ босхо дистанционнай ньыманан үөрэҕи ааһаллара ирдэнэр.
“2024 сыллаахха дистанционнай үөрэххэ өрөспүүбүлүкэ үрдүнэн, ол иһигэр Мииринэй уонна Ленскэй оройуоннарыттан, уопсайа 300-тэн тахса киһи үөрэммитэ. Бу бырайыак, биир өттүнэн, дьону үөрэтэн үлэлээх буоларга көҕүлүүр, иккис өттүнэн, АЛРОСА тэрилтэрин каадырынан хааччыйар сыаллаах. Үөрэх бырагырааматынан түөрүйэни үөрэтэллэр уонна үлэ миэстэтигэр быраактыканы ааһаллар. АЛРОСА тэрилтэлэриттэн ханнык бакаансыйалар баалларын билсэ олоробут. Инньэ гынан, ситиһиилээхтик үөрэммит дьону салгыы үлэ миэстэтинэн хааччыйарга мэктиэлиибит, – диэн АЛРОСА Корпоративнай университетын салайааччыта Анна Подкаменная этэр.
Быйыл Корпоративнай университет Саха сирин үлэтэ суох нэһилиэнньэтиттэн 150 киһини дистанционнайдык үөрэтиэҕэ.
Холобур, үөрэннэхтэринэ, Айхаллааҕы хайа кэмбинээтигэр (Айхал бөһ.) массыынаны өрөмүөннүүр 5-с эрэсэрээттээх слесарь, тэриллэри өрөмүөннүүр, көрөр-истэр 5-с эрэсэрээттээх слесарь идэлэригэр үлэҕэ ылыахтарын сөп.
Мииринэй куоракка АЛРОСА Хапытаалынай тутуутун управлениетыгар технологическай тэриллэргэ уонна манна сыһыаннаах конструкцияларга үлэлиир 3-с эрэсэрээттээх монтажник наада. Ленскэйгэ баар “Алмаздортранс” өрүс пуордугар навигация кэмигэр (алтынньы 30 күнүгэр диэри) кыраан (портальнай) 6-с эрэсэрээттээх машиниһын, баахтаҕа үлэлиир кыраан (автомобильнай) 6-с эрэсэрээттээх машиниһын, 4-с эрэсэрээттээх стропальщигы көрдүүллэр.
Баҕалаахтар уот, гаас сыбаарсыгар, өрөмүөннүүр слесарьга, электромонтёрга уонна наладчикка үөрэниэхтэрин сөп. Кинилэри Мииринэйгэ, Удачнайга уонна Айхалга ититиинэн, уунан хааччыйар тэрилтэҕэ үлэҕэ ыларга мэктиэлииллэр. Онтон материальнай-тэхиньиичэскэй хааччыйыы управлениета АЛРОСА Корпоративнай университетыгар үөрэммит дьону 5-с эрэсэрээттээх слесарь-сантехник үлэтигэр ылыаҕа.
Сайаапкалары АЛРОСА Корпоративнай университетыгар туталлар: Мииринэй к., Кузаков ш. 11-рэ, “Мир” АКБ рудник, 514 кэб.
Билсэр төл.: +7411-36-99000 (4-86-60)
