Бэс ыйын 10 күнүгэр Мария Спиридонова уонна катамаран капитана Ньургун Павлов тэрээһиннэринэн, АБДь кыттыылаахтарын төрөппүттэригэр, оҕолоругар, дьиэ кэргэттэригэр хаһыс да сылын көмө, өйөбүл быһыытынан ыытыллар күөх луугу хомуйуу, сынньалаҥ тэрилиннэ.
Мария Ивановна АБДь кыттылаахтарын оҕолоругар, огдооболоругар, дьиэ кэргэттэригэр көмө-тирэх буолар үлэни тиһигин быспакка ыытар. Ол курдук, арҕаа хорсуннук сэриилэһэ сылдьар, олохторун дойдубут туһугар толук уурбут буойуттар оҕолорун, дьиэ кэргэттэрин, төрөппүттэрин кэнсиэрдэргэ, тыйаатырдарга, сииркэҕэ босхо сырытыннарыыны тэрийэр.
Оттон Ньургун Павлов АБДь кыттыылаахтарын кэргэттэригэр булчуттартан кус хомуйан үллэрбитэ, ону сэргэ туппут балыгын ыыһаан сэрии толоонугар сылдьар уолаттарбытыгар ыытыыны тэрийбитэ. Ол иһин биһиги бары олус астынабыт, киэн туттабыт, маннык үтүө дьыаланан дьарыктаналларыгар махтанабыт. Кинилэр холобурдарынан, биһиги – аҕам саастаах дьон, АБДь кыттыылаахтарын дьиэ кэргэттэригэр кыахпыт тиийэринэн көмөлөһө сатыыбыт.
Инники эппитим курдук, Мария Спиридонова уонна Ньургун Павлов сыл ахсын Өлүөнэ Эбэбитигэр, очуостарыгар тиийэ, "Кочевник" диэн катамаранынан сынньалаҥы тэрийэллэр. Ол эрээри бу катамаран мотуора эргэрэн дьоһуннаах үлэни атахтыыр эбит. Онон, өрөспүүбүлүкэ салалтата, успуонсардар бу амарах санаалаах дьоҥҥо күттүөннээх көмөнү оҥороллоругар көрдөһөбүт.
Суруйааччы Василий Гоголев-Уйулҕан
