Бэс ыйын 15 күнүгэр Чурапчы улууһун Мугудай нэһилиэгин олохтооҕо Анна Алексеевна Оконешникованы 100 сааһын туолбутунан эҕэрдэлээтилэр. Ол туһунан СӨ Үлэҕэ уонна социальнай сайдыыга министиэристибэтин пресс-сулууспата иһитиннэрдэ.
Уһун үйэлээхтэргэ бэриллэр «Үйэ саас» ытык бэлиэни СӨ Бырабыыталыстыбатын бэрэссэдээтэлэ Георгий Степанов туттарда. Маны таһынан, ытык кырдьаҕаска 1 мөл. солкуобайдаах төлөбүр оҥоһуллуоҕа.
Анна Алексеевна 1925 сыл бэс ыйын 15 күнүгэр үлэһит дьиэ кэргэҥҥэ төрөөбүт. Кини, Кэбээйи улууһугар көһөрүллүү ыар сылларын туораан, колхуоска уонна потребкооперация тиһигэр бэриниилээхтик үлэлээбит.
Тус олоҕун оҥостубакка чугас дьонугар тапталынан угуттанан, кыһамньынан муҥурданан бачча сааһыгар тиийэн кэлбит. Төрөппүттэрэ эмиэ уһун үйэлээхтэр эбит: аҕата – 99, ийэтэ — 98 саастарыгар диэри олорбуттар.
Сонун төрдө: СӨ Үлэҕэ уонна социальнай сайдыыга министиэристибэтин пресс-сулууспата
