Бишкектээҕи норуоттар икки ардыларынааҕы III-с киинэ бэстибээлин иитинэн ыытыллыбыт Киин Азия дистрибьютордарын пуорумугар «Экстра Синема» хампаанньа генеральнай дириэктэрэ Петр Чиряев Саха сирин киинэҕэ технологияларын билиһиннэрдэ. Бу дойдулар култуура өттүнэн сайдыыларыгар уонна Киин Азияҕа биир киинэ эйгэтин тэрийиигэ үчүгэй хардыы буолла.
Тэрээһиҥҥэ Кыргызстан, Казахстан, Узбекистан,Туркменистан, Иран уонна Турция киинэтин индустриятын эспиэрдэрэ киинэни көрдөрүү боппуоруостарын дьүүллэстилэр. Чиряев дакылаата улахан болҕомтону тарта. Кини, Саха сирин «Экстра Синема» платформата көмөтүнэн Арктика уһук сиргэ турар сэлиэнньэлэригэр кытары киинэ көрдөрөллөрүн, сахалыы киинэҕэ дьон көхтөөхтүк сылдьар буолан, үп-харчы киирэ турарын бэлиэтээтэ.
Табыгастаах платформаны быйыл атырдьах ыйыгар Индия Трипура штатыгар ылан туһаныахтара. Пуорумҥа Кыргызстаны кытта «Экстра Синема» платформаны ылан туһаныы уонна контенынан атастаһыы туһунан барыллаан сөбүлэһии ситиһилиннэ. Бу дойдуга сыл ахсын 60 тиийэ киинэ уһулларын үрдүнэн, нэһилиэнньэ 19%-на эрэ улахан экраҥҥа киинэ көрөр кыахтаах эбит. Онон, Саха сирин технологията Кыргызстан 3 тыһ. сэлиэнньэтигэр киинэ тиийиитин хааччыйар чинчилээх.
Сонун төрдө: СӨ Бырабыыталыстыбатын уонна Ил Дарханын пресс-сулууспата
