Саха сиригэр сэдэх балык көрүҥнэригэр сокуоннайа суох балыктааһын иһин ыстарааптааһыҥҥа дьокутааттар суолталаах быһаарыыны ылыммыттарын туһунан Ил Түмэн Сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин иһитиннэрдэ.
Кини этэринэн, норуот дьокутааттара эрэгийиэҥҥэ балыктааһын быраабылаларын кэһии иһин ыстарааптары кыччатыыга РФ Бырабыыталыстыбатыгар этии ыытар көҕүлээһини бигэргэттилэр. Маннык быһаарыыга өрөспүүбүлүкэ олохтоохторо, идэтийбит булчуттар уонна балыксыттар буруйдуур дьаһал тыйыһын туһунан этиилэрин кэнниттэн кэллилэр.
Өлүөнэ өрүс кытылыгар сокуоннайа суох бултааһын (тутуу) иһин ыстараап кээмэйэ билиҥҥитэ 160 тыһ. солк. 21 тыһ. солк. диэри кыччыахтаах. Муксуун иһин ыстараап – 3,6 тыһ. солк. тэҥнэһиэхтээх.
Андрей Находкин ыстарааптары кыччатыы уу ньуурдарын аттыгар, кытылыгар олорор нэһилиэнньэни көмүскүүргэ туһуламмытын бэлиэтээтэ. Ол эрээри айылҕа харыстабылыгар тахсар кэһиилэргэ эппиэтинэс миэрэтин тутуһар, быраканьыардааһыны сэрэтэр үлэ болҕомтоҕо ылыллыахтааҕын туһунан эттэ.
Маны таһынан, Ил Түмэн Бэрэссэдээтэлэ Алексей Еремеев «Уһук Илин уонна Забайкалье» парламент ассоциациятын мунньаҕар дойду атын эрэгийиэннэрин бэрэстэбиитэллэрэ Саха сирин дьокутааттарын көҕүлээһиннэригэр биир санааны тутуһан өйүүллэригэр ыҥырда уонна бииргэ үлэлэһии үтүө түмүктэри түргэнник ситиһэргэ кыах биэриэҕэр халбаҥнаабат эрэллээҕин биллэрдэ.
«Саха сирин өрүстэригэр үлэлиир уонна уу баайын туругар хоромньулаахтык дьайар элбэх тэрилтэ баарын учуоттуур олус суолталаах», — диэн Андрей Находкин эбэн эттэ.
Дьокутааттар баһыйар куоластарынан быһаарыы ылылынна. Докумуон сотору РФ Бырабыыталыстыбатын таһымыгар көрүллүөхтээх. Ыстарааптары ааҕыы ньыматыгар киирбит этии манна быһаарыллыахтаах.
Хаартыска: Улус Медиа
Ил Түмэн пресс-сулууспата.
