Бүгүн Дьокуускай куорат баһылыга Евгений Григорьев Үс Хатыҥҥа Кыайыы 80 сылыгар аналлаах Туймаада Ыһыаҕар бэлэмнэнии хайдах бара турарын бэрэбиэркэлээтэ. Таарыйа суруналыыстары ыҥыран ыйытыыларга хоруйдаата. Кини быйылгы ыһыахха, бастатан туран, дьоҥҥо куттал суох буолуутун хааччыйыы күүһүрдүллүбүтүн тоһоҕолоото:
«Быйылгы ыһыахпыт улахан суолталааҕын өйдөөн тураммыт, бэлэмнэниибит күүскэ бара турар. Бастатан туран, терроризмы сэрэтэр туһуттан түһүлгэҕэ бэс ыйын 28-29 күннэригэр мобильнай интэриниэти тохтоторго күһэлиннибит. Онон, ыһыахха кэлээри сылдьар дьоммутун барытын сэрэтэбит уонна көрдөһөбүт. Бука диэн ыһыахха кумааҕы харчыны уонна баан каартаҕытын илдьэ сылдьыҥ. Интэриниэт атыыһыттарга уонна СМИ үлэһиттэригэр эрэ көрүллүө. Онтон атыттарга 2G суотабай сибээс эрэ баар буолуо», - диэн баһылык быһаарда.
Итини таһынан Евгений Николаевич сүрүн трибуна иннигэр көрөөччүлэргэ анаан эбии 300 миэстэлээх ыскаамыйалары тута сылдьалларын, оһуокай быстыбакка барарын туһугар кырдьаҕас этээччилэргэ анаан балаҕан туппуттарын кэпсээтэ уонна көрдөрдө. Маны таһынан, оту охсуу, хомуйуу күннэтэ барар эбит.
«Кыым.ру» саайт дьону тиэйэр шатыллар үлэлэрин, чэпчэтинэр (туалет), илии суунар сир тиийбэтин туһунан ыйытыытыгар баһылык шатыллар массыына, оптуобус тохтуур былаһааккатыттан дьону күнүстэри-түүннэри босхо тиэйиэхтээхтэрин, чэпчэтинэр уонна илии суунар сирдэри быйыл элбэтэн биэрбиттэрин, өссө душтанар сирдэр баар буолуохтарын эттэ.
Манна даҕатан, куораттан Үс Хатыҥҥа диэри икки муниципальнай маршрут сүүрүөхтээҕин санатабыт. 155-с оптуобус Мэдиссиинэ кииниттэн, 156-c оптуобус вокзалтан айанныахтара. Сыаната – баан каартатынан 70 солк., уу харчынан – 80 солк.
Бэйэ кэр.
