СӨ гражданскай оборона уонна нэһилиэнньэ олоҕор куттал суох буолуутун хааччыйыы миниистирэ Дмитрий Лепчиков иһитиннэрбитинэн, өрөспүүбүлүкэ оперативнай штаба Илиҥҥи байыаннай уокурук бэрэстэбиитэллэригэр үрдүк технологиялаах саҥа сэрии сэбин, ол иһигэр «камикадзе-дроннары» уонна пилота суох көтөр элбэх соруктаах «ЯК-14» платформалары, туттарда.
Бу – байыаннайдар уонна саха инженердэрин үлэлэрин түмүгэ. Сэрии сэптэрэ тургутууну ааспыттар, анал байыаннай дьайыыларга хайыы үйэ туттуллубуттар. «ЯК-14» – араас таһаҕаһы тиэйэр, бааһырбыттары таһаарар, сэрии сэбин тэйиччиттэн салайар автономнай робот. Ону таһынан, «камикадзе-робот» быһыытынан өстөөх тиэхиньикэтин уонна инженернэй тэрилин үлтүрүтэргэ туттуллуон сөп.
Сотору кэминэн дойду сэбилэниилээх күүстэригэр өссө радиоэлектроннай утарылаһыы тэрилин баартыйатын ыытыахтара. Ити курдук, оперативнай штаб көмөтө тиһигин быспат. Бу сыл тохсунньу ыйыттан Дьокуускай – ДНР маршрутунан 29 эриэйсэни оҥорбуттар. АБДь зонатыгар 90 ахсааннаах тырааныспар тиэрдиллибит.
Сонун төрдө: СӨ Бырабыыталыстыбатын уонна Ил Дарханын пресс-сулууспата
