Бэс ыйын 20 күнүгэр «Өлүөнэ турууктара» национальнай паарка ытык сиригэр ыал буолуу сиэрэ-туома маҥнайгытын ыытылынна. Паарка эдэр үлэһиттэрэ Уйусхан Семенов уонна Айталена Трифонова төрөппүттэрин уонна ыалдьыттарын кытта 2,5 км уһуннаах суолунан 200 м үрдүктээх сиргэ тахсан дьиэ кэргэн аатын сүктүлэр. Кыыс Хаҥалас улууһун Тумул сэлиэнньэтиттэн, уол Хатастан төрүттээхтэр.
Өрөспүүбүлүкэ болуоссатыгар аан бастакы ыал буолууга олохтоммут саҥа үгэһинэн, төрөппүттэр, биһилэхтэри алҕаан, саҥа ыал дьолун түстээтилэр. Үөрүүлээх бэлиэтээһини Хаҥалас улууһун Тиит Арыы нэһилиэгин дьаһалтата толордо. Эдэрдэри СӨ Бырабыыталыстыбатын ЗАГС Управлениетын салайааччыта Дария Слепцова, Национальнай паарка дириэктэрэ Аркадий Семенов уонна улуус баһылыгын э.т. Юрий Никифоров эҕэрдэлээтилэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
