Бэс ыйын 24 күнүгэр Д.К. Сивцев-Суорун Омоллоон аатынан Судаарыстыбаннай опера уонна балет тыйаатырыгар I Норуоттар икки ардыларынааҕы «Үтүө санаа симфонията» муусуканы толоруу сатабылыгар куонкурус-бэстибээл аһыллыыта буолла. Тэрээһиҥҥэ Монголияттан, Кытайтан, Казахстантан, Узбекистантан уонна Арассыыйа Уһук Илиҥҥи 9 эрэгийиэниттэн 150 тахса мусукаан уонна камернай ансаамбыл 18 номинациянан 6 хайысханан кыттыахтара.
Дьүүл сүбэтин бэрэссэдээтэллэринэн буоллулар: «Фортепиано» - Монголия судаарыстыбаннай консерваториятын ректора, профессор Цэрэнжигмэдийн Шаравцэрэн, «Устурууналаах үстүрүмүөннэр» - Казахстан Ускуустуба национальнай университетын профессора Нигметулла Каримов, «Үрэр мас үстүрүмүөннэр» - эмиэ бу универистет доцена Дамиля Махпирова, «Үрэр алтан уонна охсор үстүрүмүөннэр» - Хворостовскай аатынан Ускуустуба Сибиирдээҕи институтун профессора Петр Казимир, «Академическай ырыаны толоруу» - СССР норуодунай артыыһа Анегина Ильина-Дмитриева, «Камернай ансаамбыл» - Чайковскай аатынан Москубатааҕы судаарыстыбаннай консерватория профессора Константин Маслюк.
Бэстибээл үөрүүлээх аһыллыытын кэннэ дьүүл сүбэтин кыттыылаахтара кэнсиэр көрдөрдүлэр. Куонкурус-бэстибээл кыттааччылара сценаҕа тахсан сэрэбиэй тардыбыттара ураты долгутуулаах буолла. Тэрээһин түмүгүнэн Уһук Илиҥҥи федеральнай уокурукка бастакы Ыччат симфоническай аркыастырын тэрийиэхтэрэ. Манна киирбит лауреаттар бэс ыйын 29 күнүгэр гала-кэнсиэргэ кыттыахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
