Бэс ыйын 26-28 күннэригэр Дьокуускайга Астана куорат култууратын күннэрэ ыытыллыахтара. Ол иитинэн култуура, успуорт, атыы-эргиэн тэрээһиннэрэ уонна дьиҥ таһымнаах көрсүһүүлэр буолуохтара. Ыраахтан кэлбит ыалдьыттар Туймаада ыһыаҕар сылдьыахтара.
Бэс ыйын 27 күнүгэр Казахстан Өрөспүүбүлүкэтин Астана куоратын Акиматын уонна СӨ Бырабыыталыстыбатын икки ардыгар Бэйэ-бэйэни өйдөһүү меморандума түһэрсиллиэҕэ. ИТ-пааркаҕа норуоттар икки ардыларынааҕы «Астана – Саха сирэ» урбаан пуорумун чэрчитинэн, цифровизация уонна креативнай индустриялар, туризм эйгэлэригэр сыһыаннаах дьыалабыай сиэссийэлэр ыытыллыахтара.
Умнуллубат түгэнинэн Опера уонна балет тыйаатырыгар гала-кэнсиэр буолуоҕа. Манна Казахстан киин куоратын биллиилээх артыыстара уонна айар кэлэктииптэрэ кыттыахтара. Астана куорат култууратын күннэрин былырыын Казахстаҥҥа Саха сирин күннэрин кэмигэр былааннаабыттара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
