От ыйын 4-5 күннэригэр ыытыллыахтаах XVIII Олоҥхо Ыһыаҕын тэрээһиннэрэ от ыйын 2 күнүгэр саҕаланыахтара. Бу күн Саха сирин бары муннугуттан кэлбит ыалдьыттары уонна кыттааччылары үөрүүлээхтик көрсүү буолуоҕа. Ыһыах чэрчитинэн 70 тэрээһин ыытыллыаҕа.
Сүрүн күрэхтэһэр бырагыраама от ыйын 3 күнүгэр саҕаланыаҕа уонна үс күн устата барыаҕа. Манна бастыҥ олоҥхоһуттар, тойуксуттар уонна фольклору тарҕатааччылар кыттыахтара. Бу күн Иенгра олохтоохторо кыттыылаах «Злой дух Ямбуя» уус-уран киинэни көрдөрүөхтэрэ.
«Пока стоят священные горы, мир не рухнет» диэн ааттаах Олоҥхо ыһыаҕын үөрүүлээх аһыллыыта от ыйын 4 күнүгэр 11 чаастан саҕаланыаҕа. Бу күн күрэс төрүт көрүҥнэригэр уонна норуот төрүт дьарыгар, саха ох саатын уонна быһаҕы оҥорууга күрэхтэр, декоративнай-прикладной ускуустуба быыстапката буолуохтара. Манна былыргы сиэри-туому уонна үгэстэри билиһиннэриэхтэрэ.
Оҕолорго анаан судаарыстыбаннай тыйаатырдар испэктээктэри көрдөрүөхтэрэ. Биллиилээх олоҥхоһуттар уонна тойуксуттар: С.А. Зверев-Кыыл Уола, С.Г. Алексеев-Уус уола Уустарабыс, Р.П. Алексеева-Бөҕө Арамаан үбүлүөйдэригэр аналлаах тэрээһиннэр буолуохтара. Бөдөҥ бэлиитик уонна судаарыстыбаннай диэйэтэл Г.И. Чиряев 100 сааһыгар аналлаах төгүрүк остуол уонна Нерюнгри куорат үбүлүөйүгэр аналлаах «Нерюнгри: от прошлого настоящему ради будущего» диэн стратегическай сиэссийэ ыыттыллыахтара.
Ыһыаҕы от ыйын 5 күнүгэр киэһэ 18.00 чаастан Олоҥхо Тыйаатырын «Прекрасная Нюнгурмок – матерь эвенкийская, с длинной косой на шесть саженей» туруоруутунан түмүктүөхтэрэ. Манна кыайыылаахтары наҕараадалыахтара уонна Кэбээйи улууһугар Олоҥхо Ыһыаҕын бэлиэтин Ытык Дуоҕаны туттарыахтара.
