2022 сылтан төрүт култуура нэһилиэстибэтин судаарыстыба таһымыгар өйүүр туһугар Ил Дархан истипиэндьийэтэ ананар. Ол кэмтэн барыта 81 киһи ылбыт. Бу биллиилээх олоҥхоһуттар, тойуксуттар, оһуокайдьыттар, тимир уустара уонна норуот маастардара. Аны истипиэндьийэни сыл ахсын сэттэ олоҥхоһукка, сэттэ тойуксукка, сэттэ тимир ууска уонна сэттэ норуот маастарыгар туттараллар.
Бастакы истипиэндьийэни олоҥхоһуттар, оһуокайдьыттар уонна тимир уустара ылбыттара. Норуот маастара Борис Неустроев-Мандар Ууска (Таатта улууһа) тимири уһаарыыны сайыннарыыга ураты улахан үтүөтүн иһин олоҕун тухары бэриллэр истипиэндьийэни анаабыттара.
2023 сылтан истипиэндьийэни норуот маастардарыгар аныыллар. Олоҥхону сөргүтүүгэ, харыстааһыҥҥа уонна тарҕатыыга сүҥкэн үтүөтүн иһин олоҕун тухары бэриллэр истипиэндьийэ биллиилээх олоҥхоһут Никандр Тимофеевка анаммыта (Сунтаар улууһа).
2025 сыллаахха Олоҥхо ЮНЕСКО шедеврын быһыытынан билиниллибитэ 20 сылынан истипиэндьийэни ылааччы ахсаана 107 буолуо. Үгэс быһыытынан, истипиэндьийэлэри Олоҥхо күнэ бэлиэтэнэр сэтинньи 25 күнүгэр туттарыахтара. Күрэххэ кыттыыга сайаапкалары сэтинньи 10 күнүгэр диэри ылыахтара. Кыайыылаахха сыл устата ый ахсын төлөнөр истипиэндьийэ кээмэйэ 30 тыһ. солк.
Сонун төрдө: СӨ Бырабыыталыстыбатын уонна Ил Дарханын пресс-сулууспата
