От ыйын 8 күнүгэр Арассыыйаҕа Дьиэ кэргэн, таптал уонна бэриниилээх буолуу күнэ бэлиэтэнэр. Бу күн өрөспүүбүлүкэбитигэр дьиэ кэргэн сыаннастарыгар иитэр флешмобтар, куонкурустар, күрэхтэһиилэр уонна да атын тэрээһиннэр ыытыллыахтара.
Киэҥ далааһыннаах бырааһынньык Дьокуускайга 15:00 чаастан Хомсомуол болуоссатыгар уонна Култуура-сынньалаҥ пааркатыгар буолуоҕа. Манна 25 сылтан ордук олорбут кэргэнниилэргэ «Таптал уонна бэриниилээх буолуу иһин» мэтээли туттарыахтара. Ону таһынан Бүтүн Арассыыйатааҕы «Сыл бастыҥ дьиэ кэргэнэ» куонкурус өрөспүүбүлүкэтээҕи түһүмэҕин сэттэ номинациятын кыайыылаахтарын биллэриэхтэрэ. Кинилэр Ил Дархан 300 тыһ. солкуобайдаах бириэмийэтин ылыахтара.
Өссө тапталга билинии уонна оҕо кэлээскэтин киэргэтии куонкурустара ыытыллыахтара. Бырааһынньыгы 17:00 чааска саха эстрадатын сулустарын кэнсиэрэ түмүктүөҕэ.
