От ыйын 6-7 күннэригэр Мэҥэ Хаҥалас улууһун Нуораҕана сэлиэнньэтин «Илгэ» лааҕырын базатыгар Тыа хаһаайыстыбатын уонна Үөрэх министиэристибэлэрин бастакы холбоһуктаах кэллиэгийэтэ буолуоҕа. Манна аграрийдар, педагогтар, ыччат дьон уонна эспиэрдэр мустан тыа хаһаайыстыбатыгар каадырдары бэлэмнээһин тиһигин тэрийиигэ уонна үөрэх бырагыраамаларын сөп түбэһиннэриигэ этиилэри хомуйуохтара.
«Саха сирин тыатын хаһаайыстыбата аныгы технологиялары кытта сатаан үлэлиир үрдүк таһымнаах исписэлиистэргэ наадыйар. Бу пуорум аныгы көлүөнэни тыа хаһаайыстыбатыгар сыһыарар ньымалары тобулууга, сайдыыны түстүүр уларыйыылары таһаарарга бастакы хардыы буолар», - диэн тыа хаһаайыстыбатын миниистирин солбуйааччы Сахаяна Павлова бэлиэтээтэ.
Тэрээһин бастакы күнүгэр «Кадры в АПК» федеральнай бырайыагы, 2035 сылга диэри агротехнологическай үөрэхтээһин кэнсиэпсийэтин дьүүллэһиэхтэрэ, тыа хаһаайыстыбатыгар сыыппараны уонна роботтары туһаныы, агро оскуолалары сайыннарыы уонна ыччат саҥа көҕүлээһиннэрин тула кэпсэтиэхтэрэ. Иккис күҥҥэ кэллиэгийэ үлэтин түмүгүнэн Саха сиригэр аграрнай үөрэхтээһин сайдыытыгар быһаарыылары ылыныахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
