От ыйын 5 күнүгэр Нерюнгри оройуонун Таастаах ытык сиригэр XVIII Өрөспүүбүлүкэтээҕи Олоҥхо Ыһыаҕа эбэҥки нимнгаканнарын матыыбынан туруоруллубут «Крылья судьбы» тыйаатырдыы көрдөрүүнэн түмүктэннэ.
Бырабыыталыстыба бэрэссэдээтэлэ Сергей Местников ыһыах олус үрдүк таһымҥа тэриллибитин иһин Нерюнгри олохтоохторугар уонна оройуон баһылыгар Роман Щегельнякка махтанна. Ил Түмэн бэрэссэдээтэлин бастакы солбуйааччы, Олоҥхо ыһыаҕын тэрийэр кэмитиэтин бэрэссэдээтэлэ Александр Жирков быйылгы Олоҥхо Ыһыаҕа өрөспүүбүлүкэ култуурунай олоҕун устуоруйатыгар биир бэлиэ уонна бастыҥ тэрээһин быһыытынан киирэрин эттэ. Баһылык Роман Щегельняк Олоҥхо Ыһыаҕа Нерюнгригэ өссө да эргиллэригэр, бар дьон маннык үөрүүнү, сомоҕолоһууну өссө да билэр дьолго тиксэригэр баҕарда.
Ыһыахха 16 улуустан уонна киин куораттан 200 тахса олоҥхоһут күөн күрэстэстилэр. Манна Гран-при хаһаайкатынан улахан дьон ортотугар Чурапчы улууһуттан Сусанна Лазарева буолла. Киниэхэ 700 тыһ. солк. сэртипикээт туттардылар. Ыччат ортотугар Мэҥэ Хаҥаластан Станислав Иванов бастыҥ буолла. Киниэхэ 300 тыһ. солк. сэртипикээт туттардылар.
Оһуокайдьыттар күрэхтэригэр 100 тахса киһи кытынна. Бастыҥ этээччинэн Ньурба улууһуттан Розалия Тихонова буолла. Киниэхэ 100 тыһ.солк. сэртипикээти биэрдилэр. Хомусчуттарга Бүлүү улууһуттан Айаал Дмитриев кыайда. Киниэхэ үрүҥ көмүс хомуһу туттардылар.
Ыһыаҕы үөрүүлээхтик сабыыга Нерюнгри оройуонун баһылыга Роман Щегельняк Ытык Дуоҕа бэлиэни Кэбээйи улууһун баһылыгын э.т. Александр Сивцевка туттарда. Тэрээһин үгэс быһыытынан оһуокайынан түмүктэннэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Нарыйа Пахомова уонна Саина Титова, ЯСИА
