А. Н. Осипов аатынан Бэрдьигэстээх орто оскуолатын «Мохсоҕол» байыаннай-патриотическай кулууба «Зарница 2.0» оонньуу уокуруктааҕы түһүмэҕэр Саха сирин аатын ситиһиилээхтик көмүскээн Уһук Илин чөмпүйүөнэ буолла. Онон, оҕолор Волгоградка ыытыллыахтаах Бүтүн Арассыыйатааҕы оонньуу тиһэх түһүмэҕэр Уһук Илиҥҥи федеральнай уокурук аатын көмүскүүр чиэскэ тигистилэр.
Оонньуу уокурутааҕы түһүмэҕэ Хабаровскай кыраайга Росгвардия полигонугар ыытыллыбыт. Манна Уһук Илин бары эрэгийиэнин хамаандалара кыттыбыттар. Кыттааччылар идэтийбит таһымнарын бэрэбиэркэлиир араас сорудаҕы толорбуттар: уот аһар позициялары буулдьанан ытыы, мэдиссиинэ көмөтүн оҥоруу, топографияны уонна инженер дьыалатын билии, эт-сиин бэлэмин көрдөрүү, хиимийэттэн көмүскэнии уонна байыаннай исписээлнэстэринэн тургутуу. Маны таһынан, Арассыыйа уонна дойду сэбилэниилээх күүстэрин историятын билиэхтээхтэрэ.
«Биһиги дьоһуннаах кыттааччылары кыайбыппытыттан уонна Уһук Илин аатыттан Волгоградка кытта барар буолбуппутуттан олус үөрдүбүт. Онньуу бары көрүҥнэрэ олус интэриэһинэй этилэр. Долгуйууну аахсыбакка, санаабытын сорудахтары толорууга уурбуппут», — диэн «Мохсоҕол» этэрээт хамандыыра, 7 «а» кылаас үөрэнээччитэ Павлов Толя кэпсээтэ.
«Оҕолор күүскэ бэлэмнэммиттэрин уонна түмсүүлээхтэрин көрдөрдүлэр. «Зарница 2.0» оонньуу дьиҥнээх Аҕа дойдуну көмүскээччилэри иитэргэ көмөлөһөр, оҕолорго санаа күүһүн уонна дойдуга тапталы үөскэтэр. Волгоградка кыттыыга өссө кыһанан бэлэмнэниэхпит», – диэн эт-сиин култууратын уонна Аҕа дойдуга куттал суох буолуутун хааччыйыы учуутала Владимир Тарасов иһитиннэрдэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
