Быйыл сайын М.К. Аммосов аатынан ХИФУ мэдиссиинэ института 425 бырааһы, ол иһигэр 165 ординаторы, 3 магистыры уонна 11 бакалавыры үөрэтэн таһаарда. 56 бүтэрээччи орто идэлээх үөрэх дьупулуомун ылла.
«Саха сирин быраастарын кэккэтин «Лечебное дело» хайысханан 104 бүтэрээччи, 33 педиатр, 31 стоматолог, 9 провизор, «Медико-профилактическое дело» хайысханан 13 исписэлиис хаҥаттылар. 169 бүтэрээччи тус сыаллаах ананыынан үлэлии барыахтара», - диэн СӨ Доруобуйа харыстабылын министиэристибэтэ иһитиннэрдэ.
Ону таһынан 40 устудьуон Арассыыйа атын эрэгийиэннэригэр тус сыаллаах хайысхаларынан быраас дьупулуомун ылан Саха сирин мэдиссиинэтин тэрилтэлэригэр үлэлии киириэхтэрэ. Оттон өрөспүүбүлүкэ мэдиссиинэтин колледжтара 1742 орто звено исписэлииһин бэлэмнээн таһаардылар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
