От ыйын 7 күнүгэр «Өлүөнэ турууктара» национальнай паарка көрөр былаһааккатын аттыгар Николай Чудотворец аатыгар тутуллубут саҥа часовняны сибэтии гынар үөрүүлээх тэрээһин буолла.
200 м тахса үрдүктээх тутуу паарка духуобунас уонна архитектура доминантата буолла. Сибэтии гыныы туомун Саха сирин уонна Ленскэй архиепискоба Роман толордо. Тэрээһиҥҥэ Өлүөнэ турууктарыгар кэлбит туристар кыттыстылар.
Часовня Императордыы православнай палестина уопсастыбатын маннааҕы салаатын көҕүлээһининэн уонна «Өлүөнэтээҕи өрүс холбоһуктаах пароходствота» ПАО көмөтүнэн тутулунна.
«ЛОРП» генеральнай дириэктэрэ Сергей Ларионов эппитинэн, Өлүөнэ турууктарыгар часовня тутар санаа 2019 с. үөскээбит. Ол сыл 200 м үрдүктээх сиргэ тутуу матырыйаалын таһаарбыттар. Ол эрээри кэккэ төрүөтүнэн эбийиэги тутуу биэс сыл устата тохтоон турбут.
«ЮНЕСКО харыстабылыгар сылдьар национальнай пааркаҕа часовняны тутууга көҥүл ылаары РФ айылҕа ресурсаларын миниистирэ Дмитрий Кобылкиҥҥа киирэ сылдьыбытым. Кини биһиги этиибитин тута өйөөбүтэ, онон тутуу саҕаламыта. Часовня православнай итэҕэллээх дьону эрэ буолбакка, барыларын үөрдүөҕэр эрэнэбин», - диэн Ларионов кэпсиир.
Часовня иконаларын Волгодонскайга оҥорторбуттар. Иконостаһы Нам улууһуттан норуот маастара Еремей Малышев кыһан оҥорбут. Владыка Роман бу сыл Саха сирин епархиятыгар ураты буоларын бэлиэтээбит:
- 155 сыл анараа өттүгэр Саха сирин епархията төрүттэммитэ. Онон, часовняны сибэтии гыныы биһиэхэ улахан бэлиэ түгэн буолар. Саха сиригэр маннык тутуулар элбииллэрэ үөрдэр.
Паарка дириэктэрэ Аркадий Семенов туризмы сайыннарыыга саҥа саҕахтары арыйарын тоһоҕолоото:
- Биһиги Өлүөнэ турууктара айылҕаны кэрэхсиир эрэ сир буолбакка, духуобунай тардыһыы сирэ буолуон баҕарабыт. Ол курдук, инникитин бу часовняҕа православнай уонна ыал буолуу туомнарын ыытыахтара.
Ити курдук национальнай паарка ЮНЕСКО аан дойдутааҕы нэһилиэстибэтин эбийиэгин таһынан дьон духуобунайдык сынньанар, санаатын сааһылыыр, ураты түгэннэри көрсөр сирэ буолан эрэр.
Бэйэ кэр.
