Бүгүн киин куоракка тутулла турар Арктикатааҕы эпос уонна ускуустуба киинин суруналыыстарга көрдөрдүлэр. Генеральнай дириэктэр Андрей Борисов уонна "ВИС" бөлөх бэрэстэбиитэлэ Андрей Суслов эбийиэк өрөспүүбүлүкэ олоҕор суолтатын, хаһан тутуллан бүтэрин, инники үлэтин-хамнаһын, уратытын кэпсээтилэр.
Дьэ, килэйэн-халайан сөҕүмэр уораҕай буолсу. Бүттүүн иэнэ – 3 тыһ. кв.м., үрдүгэ – сэттэ этээстээх дьиэ тэҥэ, 1533 олорон көрөр миэстэлээх. Манна Саха сирин филармонията, Олоҥхо тыйаатыра киириэхтэрэ. Эбийиэк үс ураһаттан турар, үрдүгэр киэҥ да киэҥ сынньанар, дьаарбайар туоналаах. Сүрүн саалалары таһынан алгыс, сиэр-туом ыытар, мультимедийнай, бэлэмнэнэр саалалар, гримнэнэр хостор баар буолуохтара. Уораҕай эркиннэрэ, холуонналара барыта дьону ускуустуба эйгэтигэр тардар оҥоһуулаах, киэргэтиилээх, ойуулаах буолуохтара. Кииҥҥэ дьон култуура тэрээһинин көрө кэлэрин таһынан, көннөрү сынньана, көрө-истэ, үүнэ-сайда кэлэр усулуобуйата тэриллиэҕэ.
Андрей Саввич этэринэн, бу киин култуура эрэ эбийиэгэ буолбатах, бу - уопсастыбаннай уораҕай, онон аана сарсыардаттан киэһээҥҥэ диэри аһаҕас буолуоҕа.
«Аан дойду таһымнаах култуура уонна ускуустуба бастыҥнара кэлэн сценаҕа тахсалларыгар бары усулуобуйа тэриллэн эрэр. Уонна сүрүнэ Саха сирин бары тыйаатырдара, Олоҥхо дьиэлэрэ кэлэн туруорууларын көрдөрөр кыахтаныахтара, араас көрүҥнээх тэрээһиннэр ыытыллыахтара. Аныгы технологиялары киэҥник туһанан, ыччат төрүт култуураҕа, эпоска, ускуустубаҕа интэриэһин тардыахпыт. Арктикатааҕы эпос уонна ускуустуба киинэ Саха сирин култууратын уонна духуобунаһын киинэ буолуоҕа», - диэн Андрей Саввич өрө көтөҕүллэн кэпсээтэ.
"ВИС" бөлөх бэрэстэбиитэлэ Андрей Суслов эбийиэк 83% бэлэмин, онон балаҕан ыйыгар бүтэрэр баҕалаахтарын эттэ. Билигин манна 120 киһи үлэлии сылдьар буоллаҕына, сотору кэминэн 350 киһи кэлэн үлэ өссө тэтимириэ. Кини Арассыыйаҕа маннык сүүнэ уонна ураты эбийиэк бастакытын тутулларын, онон инникитин Саха сирин олохтоохторун муҥутуур киэн туттуута буолар кыахтааҕын бэлиэтээтэ.
Өссө биир түгэни бэлиэтиир тоҕоостоох. Судаарыстыбаннай-чааһынай үлэлэһии көмөтүнэн Саха сирэ бэлэм үлэлиир эбийиэги бүддьүөтүгэр улахан охсуута суох ылан эрэр. «ВИС» бөлөх эрэгийиэн салалтатын кытта сөбүлэһии түһэрсэн бырайыагы бүддьүөтү таһынан үбүлээтэ. Онон, Саха сирэ инбиэстэри кытта 2031 сыл бүтүөр диэри холкутук төлөһөн бүтүөҕэ. Ол кэмҥэ чааһынай партнер эбийиэк техническэй өттүн көрүөҕэ-истиэҕэ.
Бэйэ кэр.
