Бүгүн Жатайдааҕы суудуна верфэтигэр суруналыыстары илдьэн сырытыннардылар. Тырааныспар миниистирин солбуйааччы Семен Коркин, верфэ дириэктэрэ Влад Пермяков, солбуйааччыта Дмитрий Пермяков туох үлэ бара турарын уонна барыахтааҕын сиһилии кэпсээтилэр.
Эбийиэк үлэҕэ толору киирэргэ 90% бэлэм, иэнэ - 27 тыһ. кв.м. Тутуллан бүппүт сыахха тимири кытта үлэлиир, плазменнай, гааһынан быһар, араас быһыылыыр сүүнэ тэриллэр үлэлииргэ бэлэм тураллар. Олортон биирдэстэригэр кытай исписэлиистэрэ олохтоох үлэһиттэри үөрэтэ сылдьаллар.
Кэнэҕэскитин манна сылга 10 өрүс суудунатын, ол иһигэр паромнары, баржалары, дебаркадердары, хомуллар муосталары уонна да атыны тутар буолуохтара. Итилэр өрүс суолуттан тутулуктаах муниципальнай тэриллиилэргэ тыын суолталаахтар. Ол курдук, сотору Сунтаар улууһун сакааһынан тыа хаһаайыстыбатын тиэхиньикэтин өрүһүнэн туоратар парому уонна Чурапчы улууһун сакааһынан САРМ хомуллар муостаны тутан бүтэриэхтэрэ. Таһаҕас тиэйэр суудуналары таһынан, дьону тиэйэр суудуналары тутууну эмиэ ылсыахтарын баҕараллар.
Сүрүн кыһалҕанан каадыр тиийбэтэ буолуох курдук. Бүгүҥҥү туругунан, верфэҕэ 72 киһи үлэлиир.Улахан сакаас киирэр түгэнигэр үлэһит ахсаанын 600 тиийэ элбэтиэхтэрин сөп. Онон, эрдэттэн дьаһанан, исписэлиистэргэ анаан олорор дьиэ тутан бүтэрбиттэр.
Быйыл олохтоох техникуму бүтэрбит оҕолортон түөрдэ верфэҕэ үлэлии кэлбит. Онтон биирэ – кыыс, эбиитин Арассыыйа бастыҥ сыбаарсыга буолан биэрдэ. Кини аата Юлия Харлампьева диэн.
- Жатайдааҕы техникуму бүтэрэн баран манна үлэлии киирэр олус үчүгэй эбит. Барытын быһааран, сүбэлээн-амалаан биэрэллэр. Үөрэхпин үрдэтиниэхпин баҕарабын. Ол эрээри манна үлэлии хааларым чопчу. Олус сөбүлээтим, - диэн 21 эрэ саастаах суудуна тутааччы үөрэн мичилийэр.
Бэйэ кэр.
