Саха сиригэр тыа сирин сайдар эйгэлэрин ситимин "Сайдыы" бырайыага Стратегическай көҕүлээһиннэр ааҕыныстыбалара ыытар «Дойдуну дьон уларытар» (Страну меняют люди) диэн национальнай бириэмийэ лауреата буолла.
Бырайыак лиидэрэ Иван Степанов бырайыагы олоххо киллэриигэ үтүө түмүктэри ситиспитин иһин лауреаттар ахсааннарыгар киирдэ. Бириэмийэни Москуба куоракка от ыйын 15 күнүгэр туттардылар.
«Биһиги дьон түмсэн кэпсэтэр усулуобуйатын тэрийэр туһалааҕын өйдөөбүппүт. Ол иһин «Точка кипения» халыыбынан тыа сиригэр кэпсэтэр былаһааккалары тэрийэргэ быһаарыммыппыт. Ол түмүгэр, Сахабыт сирин алта сэлиэнньэтигэр олохтоохтор бырайыактыыр үлэҕэ кытталларыгар сөптөөх сирдэр баар буоллулар. Дьон манна туһалаах дьыаланан дьарыктана уонна кыһалҕалаах боппуруостары быһаарса тиийиэхтэрэ, – диэн Иван Степанов кэпсээтэ.
Бастакы пилотнай «Сайдыы» эйгэ 2020 сыл балаҕан ыйыгар Хаҥалас улууһун Тиит Эбэ сэлиэнньэтигэр тэриллибит. Онтон үс сыл иһигэр Горнайга, Сунтаарга, Уус Алдаҥҥа уонна Анаабырга тэрийбиттэрэ. Сотору кэминэн Горнай Маҕараһыгар бастакы «Микрополис» – кэлэр кэм территорията тэриллиэҕэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
